Անցյալ շաբաթ առաջին անգամ Նիկոլ Փաշինյանն ամբիոնից հայտարարեց, որ ինչ-որ բանի համար պատասխանատու է։ Իհարկե, այդ «ինչ-որ բանը» սեռափոխ եղած մարդու պաշտպանությունն էր, բայց, ամեն դեպքում, դա առաջընթաց է: Այս մասին Facebook-ի ուղիղ եթերի ժամանակ հայտարարեց «ՎԵՏՕ» հասարակական շարժման նախագահող Նարեկ Մալյանը։

Նրա խոսքով, Փաշինյանի այդ հայտնի ելույթից հետո հարց մնաց, թե ումի՞ց է պաշտպանում վարչապետը Մել Դալուզյանին, որովհետև նրա հետ որևիցե մեկը խնդիր չուներ։ Ըստ այդմ, Մալյանը կարծում է, որ Փաշինյանը սորոսականների պատանդն է.

«Այս ամենը հաշվի առնելով եկանք այն եզրահանգման, որ Նիկոլ Փաշինյանին պատանդ են վերցրել և ստիպում են, որ ապազգային օրակարգը արդեն կիրառի։ Պատանդ են վերցրել սորոսականները։ Իրենք իրենց կամքն են թելադրում մեր վարչապետին և ստիպում են, որ նա ապուշ բաներ խոսի։ Օրինակ՝ Դալուզյանին վերցնի իր պաշտպանության տակ, անիմաստ բաներ խոսի, որոնք զուրկ են թե՛ բովանդակային իմաստից, թե՛ նպատակահարմարությունից։ Նիկոլ Փաշինյանին ստիպում են, որ ապազգային օրակարգը կիրառման փուլ մտնի», - ասաց Նարեկ Մալյանը։

Ըստ այդմ, նոյեմբերի 20-ին, ժամը 15։00-ին, Բաց հասարակության հիմնադրամների երևանյան գրասենյակի դիմաց «Ազատություն Նիկոլ Փաշինյանին» խորագրով ցույց է անցկացվելու, որով պահանջվելու է, որպեսզի Նիկոլ Փաշինյանին ազատ արձակեն.

«Մենք պահանջելու ենք նրա ազատությունը, որովհետև գտնում ենք, որ վարչապետին պետք է ազատագրել Սորոսի, օտարերկրյա գործակալական ցանցի ճիրաններից և տեղափոխել հայկական օրակարգ։ Մենք գտնում ենք, որ սթափ, ադեկվատ մարդը չի կարող նման արտահայտություններ անել, այն  է՝ մենք ֆինանսավորել ենք Դալուզյանի չեմպիոնության հատվածը և այլն։ Մենք եկել ենք եզրահանգման, որ էս մարդը (Փաշինյանը - խմբ.) պատանդի կարգավիճակում է, իրեն մեղադրելու չէ այդ ամենի համար, քանի որ գերի է վերցրել օտարերկրյա գործակալական ցանցը ու զենքը դրել են ճակատին, ասում են՝ էշ-էշ բաներ ասա, ինքն էլ ստիպված ասում է: Եվ մեր խնդիրն է պահանջել ազատ արձակել Նիկոլ Փաշինյանին», - հայտարարեց Նարեկ Մալյանը։