Երեւանի աղբահանությունը կոլապսի հասցրած «Սանիթեք» ընկերության աշխատակիցները բողոքի ցույց են անցկացնում Երեւանի քաղաքապետարանի մոտ, որտեղ այսօր ավագանու նիստ է անցկացվում: Հավաքվածները ասում են, որ օգոստոսի աշխատավարձ իրենց չի վճարվել, քանի որ քաղաքապետարանը «Սանիթեքին» գումար չի փոխանցել:

«Չէ՞ որ մենք աշխատել ենք՝ լավ, վատ, միջին, թե ինչ: Թե ոնց ենք աշխատել… աշխատել ենք, թող փոխանցեն, բոլորս էլ ընտանիքի տեր մարդիկ ենք, վարկեր ունենք», «Այն աշխատավարձը, որ մենք պիտի ստանայինք, ամսի մեկին պիտի փոխանցվեր, ամսի տասն է, մինչեւ էսօր չի փոխանցվել: Ունենք վարկեր: Դե եթե էդ հիմնարկը փակում են, թող բանկերի հետ էլ համագործակցեն, ասեն՝ վարկերը սառեցրեք, մինչեւ էս մարդիկ տեղավորվեն աշխատանքի: Իսկ հիմա որ վարկերը չմուծենք, պիտի արդեն հարկադիրից գան տնե՞րը խլեն ձեռներիցս», «Ուր էլ գնում ես հարցազրույցի, ասում ա՝ հիսուն տարեկանն անց եք, կներեք, չենք ընդունում: Դե թող օրենք հանեն, որ հենց 50 տարեկանը լրացավ, գնանք կենսաթոշակի»,- ասում էին «Սանիթեքի» աշխատակիցները:

Ցույցի մասնակիցների մոտ է դուրս եկել Երեւանի աղբահանության եւ սանմաքրման համայնքային հիմնարկի ղեկավար Արմեն Գրիգորյանը եւ հավաքվածներին առաջարկում է տեղափոխվել նորաստեղծ հիմնարկում աշխատելու: Հավաքվածները մերժում են դա՝ հայտարարելով՝ իսկ մեր գումարները ով է վճարելու:

«Սանիթեքում» աշխատող վարորդներից մեկն ասում էր, որ ամսական ստացել են մինչեւ 260 հազար դրամ: Առաջարկվող գումարը 290 ահզար է՝ հարկերը ներառյալ: Մեկ այլ վարորդ նշեց, որ ստացել է 230 հազար դրամ:

Նշում են, որ մասնավոր ընկերությունը հոգում է նաեւ իրենց տեղափոխության հարցը: Համայնքային ընկերության ղեկավարը պատասխանեց, որ ինքը դա չի առաջարկում, որովհետեւ վճարվող աշխատավարձը, նրա պնդմամբ, այս դեպքում ավելի բարձր է, ուստի տեղափոխությունը պետք է կազմակերպեն աշխատակիցները: Ինչ վերաբերում է հարցին, թե «Սանիթեքը» 900 աշխատող ունի, համայնքային հիմնարկը պատրաս՞ստ է բոլորին ըդնունել, Գրիգորյանը ասաց՝ փուլ առ փուլ:

«Սանիթեք» ընկերության աշխատանքից Երեւանի քաղաքապետարանը դժգոհ է: Այս ընթացքում պարբերաբար տուգանել է այդ ընկերությանը, չի վճարել թերի կատարված աշխատանքների համար: Որպես մասնավոր ընկերության այլընտրանք, ապրիլի վերջին ստեղծվեց աղբահանության համայնքային հիմնարկը: