«Եռաբլուր» պանթեոնում շիրմաքարերին մոմ թափելու մեջ կասկաածվող անձը հայտնաբերվել է, տեղեկացնում է ՀՀ ոստիկանության պաշտոնական կայքը:

«Օգոստոսի 1-ին համացանցում «Եռաբլուրում պղծել են հերոսների շիրիմները» վերտառությամբ տեսանյութ էր տարածվել, ուր երեևում է, որ «Եռաբլուր» զինվորական պանթեոնում «ապրիլյան պատերազմի» հերոսների շիրմաքարերին ինչ-որ նյութից առաջացած հետքեր կան։

Նա հայտնաբերվել ու բերման է ենթարկվել

ՀՀ ոստիկանության պետ Վալերի Օսիպյանի հանձնարարականով ոստիկանության տարբեր ստորաբաժանումների ծառայողներ ձեռնարկեցին օպերատիվ-հետախուզական լայնածավալ միջոցառումներ՝ կատարվածի հանգամանքները կարճ ժամանակում բացահայտելու ուղղությամբ։ Արդյունքում՝ Աշտարակի ոստիկանները տեղեկություններ ստացան, որ Աշտարակի գերեզմաններում մի կին տարօրինակ վարքագիծ է դրսևորում և ինչ-որ գործողություններ կատարում շիրմաքարերի մոտ։

Նա հայտնաբերվել ու բերման է ենթարկվել ոստիկանության Աշտարակի բաժին։ Երևանի բնակիչ, 51-ամյա կնոջ հայտնածով՝ այրված մոմ է լցրել շիրմաքարերին՝ անեծքը հանելու համար։ Կինը հայտնել է նաև, որ նմանատիպ գործողություններ կատարել է «Եռաբլուրում» և այլ գերեզմանոցներում։ Դեպքի հանգամանքները պարզվում են։ Փաստի առթիվ նյութեր են նախապատրաստվում»,- ասված է հաղորդագրությունում:

Մեկ-երկուսի արած գործ չի

Ապրիլյան պատերազմի հերոս Արմեն Ուրֆանյանի մայրն ասում է` ազգին երկրորդ անգամ ցավ տվեցին: Այդուհանդերձ կարծում է, որ դիտավորություն չի եղել։ «Ես կարծում եմ՝ էս տղաները թշնամիներ չունեն։ Երևի թաղամասի փոքր երեխաներն են, որովհետև ես հաճախակի տեսել եմ երեկոյան ժամերին 13-14 տարեկան տղաների: Կարող ա եկել են, քամի ա, կպել ա, մոմերը վառվել են»,- ասաց Արմենակ Ուրֆանյանի մայրը՝ Հասմիկ Ներսիսյանը:

Նրա խոսքով՝ «Եռաբլուրում» պետք է տեսախցիկներ տեղադրվեն, հսկողությունն էլ ուժեղացվի։ «Բարգավաճ Հայաստան» խմբակցության քարտուղար Արման Աբովյանը տեղի ունեցածը լկտիություն որակեց։ Ըստ նրա՝ քառօրյայի հերոսների շիրմաքարերի ընտրությունը պատահական չի եղել։ «Պարզ երևում է, որ միտումնավոր է եղել, որովհետև, եթե ուշադրություն եք դարձրել, միայն այս հատվածն ա։ Վերևը ես նայեցի, ոչ մի բան չկար։ Այն, ինչ տեղի ունեցավ, բացարձակ լկտիություն է։ Նույնիսկ, երբ գալիս էի այստեղ, հավատս չէր գալիս։ Այսպիսի արարք պարզապես գլխիս մեջ չի տեղավորվում»,- նշեց Արման Աբովյանը:

Ազգային ժողովի «Իմ քայլը» խմբակցության պատգամավոր Սասուն Միքայելյանի համոզմամբ՝ սա որևէ խմբավորման արարք չէ, սակայն հետագայում կարող է լուրջ հետևանքներ ունենալ։ «Ամբողջ Հայաստանի Հանրապետությունում նման բան ա կատարվում, մեկ-երկուսի արած գործ չի: Ինչ-որ ծրագրված բան է կատարվում, որը նաև կազդի մեր ներքաղաքական իրավիճակի վրա։ Միգուցե միտումնավոր է արվում»,- ասաց Սասուն Միքայելյանը:

Հայտնի է վանդալիզմի հեղինակը

Ավելի վաղ լուրեր տարածվեցին, որ Եռաբլուրում հանգչած ապրիլյան պատերազմի հերոսների գերեզմանները այսօր պղծվել էին։ Շիրմաքարերի վրա ներկ, մոմ հիշեցնող նյութ էր լցված։ Ողջ օրվա ընթացքում հասարակական-քաղաքական շրջանակները քննարկում ու քննադատում էին ապրիլյան պատերազմի հերոսների շիրմաքարերը պղծելու դատապարտելի դեպքը: ArmLur.am-ի քիչ առաջ հայտնի դարձավ, որ իրավապահները Եռաբլուրի պղծման գործով հայտնաբերել են մեկ անձի: Մեր տեղեկությոններով՝ վերջինիս անունը Գրետա Մնացականյան է:

Որքան էլ տարօրինակ է, այս պահին քննվող վարկածով շիրմաքարերը պղծողը կին է եղել: ArmLur.am-ի տեղեկություններով՝ Գ. Մնացականյանն արդեն իրավապահներին հայտնել է, թե ինչու է այդ քայլին գնացել: Նա բացատրել է, որ վերևից (Բարձյալը) իրեն ասել է՝ ձեռքերդ կտրի, արյունը մոմի հետ խառնի ու շաղ տուր գերեզմանաքարերին: Ինչը և արել է: