Երևանի քաղաքապետարանի ավելի քան 1700 աշխատակիցների աշխատավարձեր չեն բարձրանա՝ աղմկահարույց օրինագիծը հանվեց ավագանու նիստի օրակարգից։ Այս մասին նիստի ժամանակ հայտարարեց Երևանի քաղաքապետ Հայկ Մարությանը և արժանացավ ծափահարությունների:

Նա նշեց, որ հարցը չիչ փակվում, այլ այն կքննարկվի, այդ թվում նաև հանրային կարծիքը հաշվի կառնվի և դրանից հետո նորից դրան կանդրադառնան:

«Այս հարցի շուրջ լուրջ խմորումներ են եղել, և եթե այն նույնիսկ դրվեր քվեարկության, ապա չէր անցնի մեծ կոնսենսուսով նույնիսկ «Իմ քայլը» խմբակցությունում։ Բայց սա կարևորագույն փաստաթուղթ է և ես կուզեի, որ առնվազն մեր ֆրակցիայի մասով լայն կոնսենսուս լիներ։ Այսօր այն չկա, բնակչության մեջ էլ իրազեկվածություն չկա։ Այս փաստաթուղթը պետք է լինի բոլորի սրտով»,- հայտարարեց Երևանի քաղաքապետը։

Հիշեցնենք, ավելի վաղ Երեւանի քաղաքապետի մամուլի խոսնակ Հակոբ Կարապետյանը հայտնել էր, որ քաղաքապետարանի 1700 աշխատակցի աշխատավարձերը կբարձրանան շուրջ 30%-ով:  

Մինչ այդ մամուլը գրել էր, որ ըստ ներկայացվող նախագծի՝ Հայկ Մարությանը նախկին 575 հազար դրամի փոխարեն կստանա ամսական 1 միլիոն 200 հազար դրամ, ճիշտ այնքան, ինչքան երկրի վարչապետն է ստանում։