Ադրբեջանի նախագահ Իլհամ Ալիևը, հանդես գալով նախարարների խորհրդի նիստում, ասել է, որ Ադրբեջանի գործունեության արդյունքում կանխվել են ԼՂ հակամարտության կարգավորման բանակցությունների ձևաչափը փոխելու փորձերը:
Նա նշել է, որ ԼՂ հակամարտության կարգավորման հարցում Ադրբեջանի դիրքորոշումը չի փոխվել. այն պետք է լուծվի Ադրբեջանի տարածքային ամբողջականության, ՄԱԿ ԱԽ բանաձևերի հիման վրա:
Ըստ Ալիևի` Ադրբեջանի «տարածքային ամբողջականությունը» երբեք չի եղել և չի լինի բանակցությունների թեմա:
«Նշեմ նաև, որ բանակցությունների ձևաչափը շարունակում է անփոփոխ մնալ: Չնայած այն հանգամանքին, որ եղել են որոշակի փորձեր, սակայն մեր գործունեության արդյունքում դրանք կանխվել են: Բացի այդ, մարտի 9-ին ԵԱՀԿ ՄԽ համանախագահների հայտարարությունը հասցեական էր, միանշանակ, վկայում էր այն մասին, որ հակամարտության կողմերը երկուսն են: Հետևաբար, կարծում եմ, որ այս թեման արդեն լուծում գտել է: Մենք կշարունակենք մնալ մեր սկզբունքային դիրքում, կամրապնդենք մեր երկիրը և բանակը»,- մասնավորապես ասել է Ալիևը:
Նշենք, որ հայկական կողմը պնդում է բանակցություններում Արցախի անմիջական եւ ուղղակի մասնակցության թեզը: Երեւանն այդ թեզից չի հրաժարվել, նշում են Հայաստանի իշխանությունները:
Էջի հասցեն: https://verelq.am/hy/node/46094