Ազգային ժողովի փոխնախագահ Լենա Նազարյանի կարծիքով, «Բարգավաճ Հայաստան» խմբակցության պատգամավոր Գևորգ Պետրոսյանի ելույթները մարդու իրավունքների տեսանկյունից «խայտառակություն են»։
«Պարոն Պետրոսյան, ուզում եմ ձեզ հիշեցնել, որ դուք այստեղ դասախոս չեք։ Նա պետք է դադարի պատգամավորներին ասել, թե ինչ գրքեր ու օրենքներ կարդան, որովհետև պարոն Պետրոսյանի կարդացած գրքերը իրեն բոլորովին չեն երաշխավորել արտահայտել այնպիսի մտքեր, որ մարդու իրավունքների տեսանկյունից ուղղակի խայտառակություն են։ Պարոն Պետրոսյանի կարդացած գրքերը չեն երաշխավորել, որ ձեր խմբակցությունում լինի մարդ, որի հանդեպ քրեական գործ է հարուցվել, պարոն Պետրոսյանի կարդացած գրքերը չեն երաշխավորել, որ ձեր խմբակցությունում լինի մարդ, որը Հայաստանի երկրորդ քաղաքը մինչև հիմա այնպիսի իրավիճակի է հասցրել, որ փոսից չեն կարողանում հանել։ Հորդորում եմ պարոն Պետրոսյանին այլևս չխոսել մեր կարդացած գրքերից և հորդորում եմ՝ որևէ մեկի քաղաքական փորձառությունը չդարձնել դրոշակ, որովհետև հիմա քաղաքականությունը ոչ թե ավելի հարմար տեղավորվելու մասին է, այլ ավելի ազնիվ, ավելի պատասխանատու և ավելի խիզախ լինելու մասին է», - Aysor հաղորդմամբ հայտարարեց ԱԺ փոխնախագահը՝ անդրադառնալով վերջին օրերին «Բարգավաճ Հայաստան» խմբակցությունից հնչած հայտարարություններին։
Հայաստանի երկրորդ քաղաք Գյումրին ծանր վիճակին հասցնելու մասին ԱԺ փոխնախագահի ակնարկն ուղղված էր «Բարգավաճ Հայաստանի» պատգամավոր Վարդան Ղուկասյանին, որը Գյումրիի նախկին քաղաքապետն էր։
Էջի հասցեն: https://verelq.am/hy/node/45495