Ես պատրաստ եմ ամեն ինչ անել ղարաբաղյան հակամարտության լուծման որոնման հարցում օգտակար լինելու համար: Այս մասին Երեւանում ասուլիսի ժամանակ հայտարարեց ԵԱՀԿ գործող նախագահ, Սլովակիայի արտգործնախարար Միրոսլավ Լայչակը:

Ըստ պաշտոնյայի, ղարաբաղյան հակամարտությունը պետք է կարգավորվի միջազգայնորեն ճանաչված երեք սկզբունքների հիման վրա՝ տարածքային ամբողջականություն, ժողովուրդների ինքնորոշման իրավունք, ուժի չկիրառում կամ դրա սպառնալիքի բացառում:

«Սա է այն ճարտարապետությունը, որի վրա պետք է կառուցվի կարգավորումը»,- ասաց Լայչակը:

Նա նաև կարծիք հայտնեց, որ թեև շատ մարտահրավերներ կան, բայց կան նաև բոլոր հիմքերը բանակցային գործընթացին դրական իմպուլս հաղորդելու համար: Լայչակի խոսքով, պետք չէ թերագնահատել ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումները:

Անդրադառնալով հարցին, թե պատրա՞ստ է մեկնել Արցախ և տեղում ծանոթանալ իրավիճակին, Լայչակը նշեց, որ վստահում է ԵԱՀԿ Մինսկի խմբի համանախագահներին և դեսպան Անջեյ Կասպրշիկին.

«Ամեն ինչ անում եմ նրանց հետ սերտ համակարգմամբ», - շեշտեց նա:

Ինչ վերաբերում է բացակցային ձևաչափի փոփոխման հարցին, ԵԱՀԿ գործող նախագահը կրկնեց իր տեսակետը`այն պետք է ընդունելի լինի բոլոր կողմերի համար: