«Ժառանգություն» կուսակցության վարչությունը որոշում է կայացրել կուսակցության հերթական համագումարն անցկացնել մարտի 31-ին, Երեւանում: Այս մասին ասված է կուսակցության տարածած հաղորդագրության մեջ:

««Ժառանգություն» կուսակցության հիմնադրման օրվանից՝ 2002 թվականից, լինելով թվով 12-րդը, համագումարը կհամախմբի Հայաստանի բոլոր ծայրերից ժամանած պատվիրակներին ու հյուրերին՝ քննարկելու հանրապետության եւ հայ ժողովրդի առջեւ ծառացած ներքին ու արտաքին մարտահրավերները:

Կուսակցության գործուն անդամների ներկայիս հավաքում, որը բաց է քաղաքական, հասարակական բոլոր շահագրգիռ ուժերի ու հանրության համար, կլսվեն հրատապ զեկույցներ տեղի ունեցող վերջին զարգացումների մասին, կընտրվի վարչության նոր կազմ եւ կհրապարակվի երկրի արդի իրավիճակից բխող՝ «Ժառանգության» բանաձեւը» ,- ասված է հայտարարության մեջ:

Նշենք, որ վարչության նախագահ Արմեն Մարտիրոսյանը արտագաղթել է Կանադա: