Դավոսում Հայաստանի պատվիրակության և Բաց հասարակության հիմնադրամների (Open Society Foundations) հիմնադիր, գործարար և բարերար Ջորջ Սորոսի միջև որևէ հանդիպում նախատեսված չի եղել և չի էլ կայացել, Aysor.am-ի հարցմանն ի պատասխան հայտնեցին ՀՀ կառավարության տեղեկատվության և հասարակայնության հետ կապերի վարչությունից։

«Դավոսում Հայաստանի պատվիրակության և Ջորջ Սորոսի միջև որևէ հանդիպում նախատեսված չի եղել և չի էլ կայացել։ Ջորջ Սորոսի՝ Հայաստան այցելելու հետ կապված որևէ պայմանավորվածություն չկա», - փոխանցել է կառավարության տեղեկատվության և հասարակայնության հետ կապերի վարչության պետի տեղակալի պաշտոնակատար Արմեն Խաչատրյանը։

Վարչապետ Նիկոլ Փաշինյանի գլխավորած պատվիրակությունը, հիշեցնենք, հունվարի 22-25-ը մասնակցում էր Շվեյցարիայի Դավոս քաղաքում կայացած միջազգային տնտեսական համաժողովին։

Ավելի վաղ Ջորջ Սորոսը կարևորել էր Հայաստանի քաղաքացիական հասարակությանն աջակցությունը: Twitter-ի իր միկրոբլոգում նա գրել էր. «Հայաստանի քաղաքացիական հասարակությանը հզոր աջակցությունը կենսականորեն կարևոր է երկրի ժողովրդավարական ներկայի և ապագայի համար»:

Աղբյուրը նշում է, որ ուկրաինական պրո-արևմտյան «ОПОРА» շարժման առաջնորդները Դավոսում հունվարի 25-ին երկու ժամ տևողությամբ հանդիպում են ունեցել Ջորջ Սորոսի հետ։ «ОПОРА»-ն հանդիսանում է 2004-2005 թվականների «նարնջագույն» իշխանափոխության կարևոր շարժիչներից մեկը։ Դավոսի համաժողովների մշտական մասնակից Սորոսի հետ պարբերաբար հանդիպումներ էին ունենում նաև վրացական նախկին իշխանությունները` վարչապետ Իրակլի Ղարիբաշվիլիի գլխավորությամբ։ Իշխանափոխությունից հետո այս տարի Սորոսը հանդիպել է, ըստ որոշ տեղեկությունների, Վրաստանի ընդդիմության ներկայացուցիչների հետ։