Հայաստանը բազմիցս է ներկայացրել ԼՂ հիմնախնդրի կարգավորման գործընթացում իր մոտեցումները, Արցախի կարգավիճակն ու անվտանգությունն առաջնահերթություն են Հայաստանի համար: Այս մասին այսօր լրագրողների հետ ճեպազրույցում ասաց ՀՀ արտաքին գործերի նախարարության մամուլի խոսնակ Աննա Նաղդալյանը:
«Բանակցությունների արդյունավետությունը բարձրացնելու համար կարեւոր նշանակություն ունի խաղաղության մթնոլորտի ապահովումը, այդ թվում՝ վստահության եւ անվտանգության մեխանիզմների ամրապնդման միջոցով, որն իր մեջ ներառում է ռիսկերի նվազումը եւ ագրեսիվ հռետորաբանության բացառումը»,- ասաց Նաղդալյանը:
Անդրադառնալով հարցին, թե վարչապետի վերջին հայտարարությունից հետո արդյո՞ք Հայաստանը փոխել է սկզբունքները, որոնք մինչ այդ բանակցվել էին, Աննա Նաղդալյանն ասաց, որ առաջին իսկ օրվանից են ամրագրել վերոնշյալ սկզբունքները, նաեւ նշվել է, որ Արցախը որոշիչ ձայն եւ ներգրավվածություն պետք է ունենա իրական եւ տեւական կարգավորման գործընթացում. «Սա այն սկզբունքային որոշումն է, որ ներկայացվել է ե՛ւ համանախագահներին, ե՛ւ ադրբեջանական կողմին»,- նշեց նա:
ԱԳՆ խոսնակը նաեւ ասաց, որ իրենք էլ, ինչպես բոլորը, տեսնում են ադրբեջանական կողմի արձագանքները. «Բայց մեր սկզբունքները բազմիցս ամրագրվել են»,- ասաց Նաղդալյանը:
Էջի հասցեն: https://verelq.am/hy/node/42076