Վլադիմիր Պուտինի հետ հանդիպման մթնոլորտը դրական էր: Ես համոզված եմ և դա իրողություն է, որ ամեն այսպիսի հանդիպումներից հետո մեր հարաբերությունները հարստանում են նոր բովանդակությամբ: Այս մասին մոսկովյան այցից հետո Facebook-ի ուղիղ եթերում հայտարարեց ՀՀ վարչապետի պաշտոնակատար Նիկոլ Փաշինյանը:
Նա նշեց, որ այդ հանդիպումը հիմնականում վերաբերվում էր երկու երկրների հետագա հարաբերությունների ռազմավարությանը, քննարկումները հենց դրա շուրջ են ընթացել.
«Ես կարող եմ արձանագրել, որ, ըստ էության, այդտեղ մենք ունենք լիակատար ըմբռնում, թե ինչպիսի ուղղություն պետք է ունենան մեր երկու երկրների հարաբերությունների զարգացումը: Այս քննարկումը մինչև այժմ եղած քննարկումների ամփոփումն էր» ,-նշեց նա:
Փաշինյանը նշեց, որ ղարաբաղյան հակամարտության կարգավորման հարցի շուրջը որևէ քննարկում Պուտինի հետ հանդիպմանը չեն ունեցել: ՀԱՊԿ-ում ստեղծված իրավիճակի շուրջ կարճ քննարկում է եղել.
«Մեր դիրքորոշումն այն է, որ այստեղ մեզ հարկավոր են ինստիտուցիոնալ լուծումներ, որպեսզի ՀԱՊԿ կանոնադրության մեջ տեղի ունենան այնպիսի ուղղումներ, որոնք հետգայում կբացառեն այսպիսի բանավեճերը չկանոնակարգավծության կապակցությամբ: Կարճ խոսակցություն է եղել նաև կազմակերպության դաշնակցային էության և բովանդակության վերաբերյալ»,- ասաց նա:
Ինչ վերաբերում է գազի թեմային, ապա որոշում չկա: Նիկոլ Փաշինյանը նշեց, որ գազի շուրջ քննարկումները կշարունակվեն աշխատանքային կարգով.
«Իհարկե արձանագրվեց, որ երկկողմ հարաբերությունների համար դա չափազանց զգայուն թեմա է: Եվ դա գիտակցում են թե՛ Հայաստանում, թե՛ Ռուսաստանում: Ես լավատեսորեն եմ տրամադրված այս թեմայի շուրջ և հույս ունեմ, որ այստեղ նույնպես մեզ համար ցանկալի զարգացումներ կլինեն կամ առնավազն անցանկալի զարգացումներ չեն լինի»,- ասաց նա:
Էջի հասցեն: https://verelq.am/hy/node/40627