Բելառուսի նախագահ Ալեքսանդր Լուկաշենկոն հրավերի է սպասում, որպեսզի ժամանի Երևան և քննարկի երկկողմ և բազմակողմ հարաբերություններին վերաբերող հարցերը: Այս մասին լրագրողների հետ ճեպազրույցում հայտարարել է «Բարգավաճ Հայաստան» կուսակցության առաջնորդ Գագիկ Ծառուկյանը:
Նրա խոսքով, չկա խնդիր, որը հնարավոր չէ լուծել (խոսքը նաև ՀԱՊԿ գլխավոր քարտուղարի նշանակման մասին է- խմբ.):
Հիշեցնենք, նախօրեին Լուկաշենկոն ԵԱՏՄ անդամ-պետությունների առաջնորդների հանդիպումից հետո հայտարարեց, թե ՀԱՊԿ գլխավոր քարտուղարի շուրջ հարցը լուծվել է, պաշտոնը հավանաբար կզբաղեցնի Բելառուսի ներկայացուցիչը: Սակայն ավելի ուշ ՀՀ վարչապետի պաշտոնակատարի խոսնակը հերքել էր նրան՝ նշելով, որևէ պայմանավորվածություն ձեռք չի բերվել, իսկ Երևանը չի փոխել իր դիրքորոշումը այդ հարցում:
Այսօր նմանատիպ հայտարարությամբ հանդես եկավ նաև ՌԴ նախագահի խոսնակ Դմիտրի Պեսկովը, որը հայտարարեց, որ կազմակերպության գլխավոր քարտուղարի նշանակման հարցը դեռ լուծված չէ:
Էջի հասցեն: https://verelq.am/hy/node/39695