Աշխատանքներ են տարվում գերեվարված Կարեն Ղազարյանին հայրենիք վերադարձնելու համար: Այս մասին այսօր լրագրողների հետ հանդիպման ընթացքում հայտարարել է ՀՀ ԱԳՆ մամուլի խոսնակ Աննա Նաղդալյանը՝ անդրադարձավ Ադրբեջանում գերեվարված Կարեն Ղազարյանի նկատմամբ դատական գործընթաց սկսելու վերաբերյալ հարցին:
ԱԳՆ մամուլի խոսնակը նշեց, որ ի սկզբանե պարզ էր, որ Ադրբեջանի իշխանությունները փորձելու են անհայտ պայմաններում Ադրբեջանի տարածքում հայտնված ՀՀ քաղաքացու ներգրավմամբ թատերական բեմականացում իրականացնել՝ տեսախցիկների առջեւ վերջինիս ներկայացնելով որպես դիվերսանտի, սակայն դա նրանց, կարծես չհաջողվեց, քանի որ Կարեն Ղազարյանն ունի հոգեկան խնդիրներ եւ պարտադիր զինվորական ծառայության չէր զորակոչվել: Հայաստանը Կարեն Ղազարյանի առողջական վիճակի վերաբերյալ բոլոր ապացույցները միջազգային կազմակերպությունների միջոցով փոխանցել էր, որոնք ակնհայտորեն անտեսվել են Ադրբեջանի կողմից:
«Փաստացի դատական գործընթաց բեմականացնելով՝ Ադրբեջանը փորձում է ծանր մեղադրանքով մեղադրել ակնհայտ առողջական խնդիրներ ունեցող մարդու, ինչը միջազգային մարդասիրական իրավունքի կոպտագույն խախտում է»,- նշեց ՀՀ ԱԳՆ մամուլի խոսնակը:
Նրա խոսքով՝ այս ամբողջ ֆարսը հետապնդում է մեկ նպատակ՝ առողջական խնդիրներ ունեցող մարդուն ներկայացնել որպես հանցագործ եւ որոշակիորեն հավասարության նշան դնել նրա եւ ծանր հանցագործություն իրականացրած դիվերսանտների միջեւ:
«Հիշեցնեմ, որ 2015թ. Արցախի դատարանի կողմից դատապարտվել է երկու ադրբեջանցի, որոնք մեղադրվում են սահմանն անօրինական հատելու, զենք կրելու, ատելության պատճառներից ելնելով անչափահասին սպանելու, անչափահասի նկատմամբ զենքի գործադրմամբ բռնություն կիրառելու, իսկ նրանցից մեկը՝ եւս երկու հոգու նկատմամբ սպանության փորձի մեջ: Ադրբեջանը փորձում է այստեղ որոշակի հավասարության նշան դնել, բայց իրականում դա նրանց դժվար թե հաջողվի»,- ասաց Նաղդալյանը՝ հավելելով, որ Հայաստանի կողմից համապատասխան աշխատանքներ են տարվում Ադրբեջանում գերեվարված ՀՀ քաղաքացի Կարեն Ղազարյանին հայրենիք վերադարձնելու ուղղությամբ:
Էջի հասցեն: https://verelq.am/hy/node/38705