Այն բոլոր քաղաքական ուժերը, պատգամավորները, ովքեր կողմ են քվեարկել Նիկոլ Փաշինյանի թեկնածությանը և կառավարության ծրագրին, դա չեն արել Նիկոլ Փաշինյանի կամ Քաղաքացիական պայմանագիր կուսակցության համար: Դա եղել է ժողովրդի պահանջը բոլորից: Նման կարծիք է հայտնել Ազգային ժողովի ԵԼՔ խմբակցության ղեկավար Լենա Նազարյանը:

«Եվ եթե հիմա ակնարկում են, որ կառավարությունը ԱԺ արտահերթ ընտրությունների հասնելու համար նրանց օգնությանն ապավինելու խնդիր ունի, չեն հաշվի առնում, որ արտահերթի հարցը հանրային պահանջ է, ոչ թե վարչապետի ցանկությունը: Հեղափոխությունը մի անձի դեմ չէր ու մի անձի համար չէ: Այլ կոռումպացված քաղաքական ու տնտեսական քանդվող համակարգերի կազմալուծման խնդիր է դրված: Այ հենց այս պահերին է առավել ակնառու երևում գաղափարական կուսակցությունների պակասը և իրական դերը»,- նշել է նա:

Ի դեպ, ԱԺ քաղաքական ուժերի որոշ ներկայացուցիչներ «սպառնում են» կողմ չլինել ԱԺ- վաղաժամ լուծարմանը:

ՀՀ վարչապետ Նիկոլ Փաշինյանը ֆրանսիական Le Monde օրաթերթին տված հարցազրույցում հայտարարել էր, որ կառավարության ծրագրում ներառված եւ ԱԺ-ում հաստատված արտահերթ խորհրդարանական ընտրությունների անցկացման որոշումը պետք է ի կատար ածվի, հակառակ դեպքում «բնակչությունը կրկին ոտքի կկանգնի»։ 

«Այդ որոշումը պիտի ի կատար ածվի, և եթե խորհրդարանը վերանայի իր իսկ ստանձնած պարտավորությունը, բնակչությունը կրկին ոտքի կկանգնի։ Մեր ընդդիմախոսները կարծում էին, թե մեր ժողովրդականությունը կթուլանա անցնող ամիսների հետ։ Անգամ մեր համակիրներից ոմանք ցանկանում էին, որ հնարավորինս արագ կազմակերպենք ընտրությունները։ Մեր հայրենակիցները կարող են տեսնել՝ ինչ ենք անում մենք, և ժամանակն աշխատում է մեր օգտին», - ասել է նա։

Այժմ Հայաստանում տեղի է ունենում ընտրական օրենսգրքի բարեփոխում։ Ավելի վաղ Նիկոլ Փաշինյանը հայտարարել էր, որ կառավարությունը նախատեսում է արտահերթ ընտրություններն անցկացնել 2019 թ-ի ապրիլ-մայիս ամիսներին։ ԱԺ-ում մեծամասնություն կազմող Հանրապետական կուսակցության խմբակցությունը դեմ է արտահայտվում արտահերթ խորհրդարանական ընտրությունների անցկացման գաղափարին։