Ազգային Ժողովի պատգամավորները մտադիր են որոշակի փոփոխություններ կատարել բարեկամական խմբերի գործունեության ընթացակարգերում: ԱԺ արտաքին հարաբերությունների մշտական հանձնաժողովի այսօրվա նիստում հավանության արժանացավ խորհրդարանական բարեկամական խմբերի գործունեության ճանապարհային քարտեզը:
Հանձնաժողովի նախագահ Արմեն Աշոտյանը նշեց, որ բարեկամական խմբերի գործունեությունը հանրության զգալի հատվածի կողմից ընկալվում է իբրև «քաղաքական տուրիզմ».
«Մեր նպատակն է վերջ դնել նման ընկալմանը, իսկ եթե այդ խնդիրն ունի հիմքեր, ապաև վերացնել այդ երևույթները»,- ասաց նա:
Աշոտյանն ընդգծեց, որ ներկայացված փաստաթուղթը հնարավորություն է ընձեռում բարեկամական բոլոր խմբերին աշխատել նույն սխեմայով, ապահովելով համապատասխան քաղաքական և հանրային հնչեղության մակարդակ:
«Բացի այդ, բարեկամական խմբերի թիրախը այսուհետ միայն տվյալ երկրի խորհրդարանը չի լինելու, խմբերը պետք է կապեր հաստատեն այդ երկրների ԶԼՄ-ների և ՀԿ-ների հետ»,- տեղեկացրեց պատգամավորը:
Հանձնաժողովի նախագահի խոսքով՝ ներկայացված փաթեթը ենթադրում է նաև հաշվետվողականության մեխանիզմներ, ինչը կստեղծի «հիշողության բազա»: Իսկ դա, բացատրեց նա, հարկավոր է այն բանի համար, որ ամեն անգամ նոր հանձնաժողով ձևավորելիս տպավորություն չստեղծվի, թե անհրաժեշտ է աշխատանքը սկսել զրոյից:
Էջի հասցեն: https://verelq.am/hy/node/35449