Բորիս Ջոնսոնը զրուցել է «Փաշինյանի» հետ ու խորհուրդ տվել կոշտ խոսել Պուտինի հետ

Ռուս պրանկերներ Վլադիմիր Կուզնեցովն ու Ալեքսեյ Ստոլյարովը, որոնք հայտնի են որպես Վովան և Լեքսուս, զանգահարել են Մեծ Բրիտանիայի ԱԳ նախարար Բորիս Ջոնսոնին՝ Հայաստանի վարչապետ Նիկոլ Փաշինյանի անունից:


Նրանք Ջոնսոնի հետ քննարկել են Ռուսաստանի մեղսակցությունը ՌԴ ԳՀՎ նախկին գնդապետ Սերգեյ Սկրիպալի և նրա դստեր թունավորմանը, լրագրող Քսենիա Սոբչակի այցը Լոնդոն, Ռուսաստանի հետ ՀՀ հարաբերություններին վերաբերող հարցեր, գրում է Daily Storm-ը:


Մինչ Փաշինյանի անունից զանգելը, պրանկերները փորձել են զանգահարել Ուկրաինայի նախագահ Պյոտր Պորոշենկոյի անունից:


«Փաշինյանի հետ խոսակցությունը, հավանաբար, հետաքրքրել է Ջոնսոնին: ՀՀ վարչապետը հիմա թրենդում է՝ նրան հատկապես եվրոպական երկրներում են սիրում: Մենք չենք փորձել նմանակել Փաշինյանին, խոսել ենք, ինչպես միշտ»,-ասել է Լեքսուսը:


Պրանկերները հայտնել են, որ հեռախոսազրույցի վերջում Ջոնսոնը հասկացել է, որ Փաշինյանի հետ չի խոսում և խզել է խոսակցությունը:


Մինչ այդ դիվանագետը Փաշինյանին մի քանի խորհուրդ է տվել, թե ինչպես պետք է շփվել Վլադիմիր Պուտինի հետ:


«Ռուսներն ընկալում են միայն վճռականությունն ու կոշտ դիրքորոշումը: Ուստի Դուք պետք է Պուտինին շատ հստակ ներկայացնեք ձեր մտադրությունները, նաև այն, թե ինչպես եք պատկերացնում Հայաստանի ապագան: Սակայն, դուք պետք է նշեք, որ դա չի սպառնում նրա շահերին և նա դրա համար նյարդայնանալու պատճառ չունի»,- հայտարարել է Ջոնսոնը:


Փաշինյանի անունից ասել են, թե ինքը չէր ցանկանա թունավորվել «Նովիչոկով» Պուտինի հետ հանդիպմանը: Ջոնսոնը ծիծաղել է, հետո նկատել, որ շատ կարևոր է նոր սառը պատերազմ չծավալել ՌԴ հետ: Ջոնսոնն ընդգծել է, որ Մեծ Բրիտանիայում ոչ ոք դա չի ցանկանում:


Լեքսուսն ու Վովանը պրանկ լրագրության ակունքներում են կանգնած: Նրանք հայտնի դարձան, երբ զանգահարեցին Ուկրաինայի նախագահ Պյոտր Պորոշենկոյին, Թուրքիայի նախագահ Էրդողանին, ԱՄՆ սենատոր Ջոն Մաքքեյնին և այլ հայտնի քաղաքական գործիչների:


Նշումներ:

Էջի հասցեն: https://verelq.am/hy/node/31511