Ադրբեջանը ղարաբաղյան հակամարտությունը ներկայացնում է որպես տարածքային խնդիր երկու երկրների միջև, սակայն իրականում սա ժողովուրդների ինքնորոշման դասական օրինակ է: Այս մասին Պորտուգալիայի Հանրապետության խորհրդարանի պատգամավոր Ռուբինա Բերարդոյի հետ հանդիպմանը հայտարարել է ՀՀ ԱԺ փոխնախագահ Էդուարդ Շարմազանովը:
ԱԺ փոխնախագահը կոչ է արել եվրոպացի գործընկերներին չդառնալ ադրբեջանական կեղծ պրոպագանդայի զոհը և աշխարհին ներկայացնել իրականությունը:
«Արցախի ժողովուրդը, ինչպես աշխարհում ցանկացած ժողովուրդ ազատ և անկախ ապրելու իրավունք ունի: Մենք ջանք չենք խնայելու՝ հասնելու Արցախի անկախության միջազգային ճանաչմանը, և Արցախի անկախության միջազգային ճանաչումն ընդամենը ժամանակի հարց է»,- նշել է Էդուարդ Շարմազանովը:
Անդրադառանալով Հայոց ցեղասպանության ճանաչման և դատապարտման հարցին՝ Էդուարդ Շարմազանովը փաստել է, որ աշխարհի բազմաթիվ երկրներ ճանաչել են այն՝ դատապարտելով միլիոնավոր քրիստոնյաների բնաջնջումը, սակայն Թուրքիան նախորդ դարասկզբին սկսած մշակութային ցեղասպանությունը շարունակում է առ այսօր. վերջին դեպքերն առնչվում են Վարագավանքին:
Իր հերթին Ռուբինա Բերարդոն նշել է, որ շատ ընդհանրություններ ունեցող երկու հպարտ ժողովուրդները կարող են համագործակցության բնագավառներ գտնել և զարգացնել կապերը մարդու իրավունքերի պաշտպանության, տնտեսական, մշակութային և բազմաթիվ այլ ոլորտներում:
Հանդիպման ավարտին Ռուբինա Բերարդոն, կարևորելով միջխորհրդարանական կապերի զարգացումը, նշել է, որ Հայաստան այցելելուց հետո հաջորդ քայլը կարող է լինել Պորտուգալիայի խորհրդարանում Հայաստանի հետ բարեկամական խմբի ստեղծումը: Էդուարդ Շարմազանովը կարևորել է Պորտուգալիայի հետ կապերի խորացումը Հայաստան-ԵՄ հարաբերությունների զարգացման և երկու երկրների միջև քաղաքական երկխոսության կայացման տեսանկյունից:
Էջի հասցեն: https://verelq.am/hy/node/21273