Թուրքիայում սահմանադրական բարեփոխումների հանրաքվեից եւ նոր փոփոխություններն ընդունելուց հետո գերմանական գլխավոր քաղաքական կուսակցությունների ղեկավարները կոչ են արել չեղարկել Անկարայի՝ Եվրամիություն մուտք գործելու վերաբերյալ բանակցությունները։ Քրիստոնեասոցիալական միության նախագահի տեղակալ Մանֆրեդ Վեբերը հայտարարել է, որ Եվրամիությունում Թուրքիայի լիիրավ անդամակցությունը «այլեւս չի կարող բանակցությունների նպատակ լինել», հաղորդում է «Գերմանական ալիք»-ը։

Վեբերը Թուրքիայի՝ ԵՄ մուտք գործելու հեռանկարները բնութագրել է որպես «ինքնախաբեություն»։ Նրա կարծիքով՝ երկրի անդամակցությունը Եվրամիությանը պետք է հանվի օրակարգից։ Նախատեսվում է, որ ԵՄ անդամ երկրների ղեկավարները մայիսի սկզբին կայանալիք գագանթաժողովին կհայտարարեն Թուրքիայի հետ հարաբերությունները վերանայելու մասին։

Գերմանիայի կառավարությունը դեռ զերծ է մնում հանրաքվեի արդյունքների վերաբերյալ մեկնաբանությունից։ Գերմանիայի ԱԳՆ ղեկավար Զիգմար Գաբրիելը զգուշավորության կոչ է արել։ Նրա խոսքով՝ պետք է «սառը գլխով մնալ» ու «խելամիտ վարք» դրսեւորել։

Քրիստոնեադեմոկրատական միության նախագահի տեղակալ Յուլիա Կլյոնկերը Huffington Post-ում հրապարակված իր հոդվածում գրել է, որ Թուրքիայի համար ԵՄ դուռը «վերջնականապես փակվեց»։ Նրա կարծիքով՝ ԵՄ մտնելու համար Թուրքիային ցուցաբերվող ֆինանսական աջակցությունը պետք է դադարեցնել։

Բացի այդ, ձախակողմյան «կանաչ» կուսակցության առաջնորդներ Սարա Վահենքնեհթը եւ Ջեմ Օզդեմիրը պահանջել են վերանայել Թուրքիայի հետ ռազմական համագործակցությունը։ Նրանց կարծիքով՝ Ինջիրլիքի ռազմաբազայում գտնվող 260 գերմանացի զինծառայողները պետք է հետ կանչվեն, իսկ Թուրքիա զենքի մատակարարումները՝ դադարեցվեն։

Նախնական տվյալներով՝ երկրի նախագահի լիազորություններն ընդլայնող սահմանադրական փոփոխությունները ապրիլի 16-ի հանրաքվեի ընթացքում հավանության են արժանացրել ընտրողների 51 տոկոսը։ Թուրքիայի նախագահ Ռեջեփ Թայիփ Էրդողանն արդեն հայտարարել է, որ ծրագրում է երկրում վերականգնել մահապատիժը։