Հայաստանն ընտրում է. քվեարկում են պաշտոնյաները, խախտումների մասին հայտնում դիտորդները

Հայաստանում մեկնարկել է խորհրդարանական ընտրությունների քվերակությունը: Այս պահի դրությամբ քվեարկել են ՀՀ վարչապետ Կարեն Կարապետյանը եւ պաշտպանության նախարար Վիգեն Սարգսյանը:


Քվեարկությունից հետո, անդրադառնալով ՀՀԿ-ի հաղթանակի շանսերին, Կարեն Կարապետյանն ասաց. «Ժամանակը ցույց կտա: Ուզում եմ՝ ամեն ինչ խաղաղ լինի, համերաշխ եւ հանդուրժող»:


Պաշտպանության նախարարն մի փոքր ավելի երկար է խոսել լրագրողների հետ: Նա վստահություն է հայտնել, որ քվեարկությունն անցնելու է խաղաղ: «Այդպես էլ կլինի, դրա համար բազմաթիվ քայլեր են արվել: Խորհրդարանական մեծամասնությունն ու ընդդիմությունն այնպիսի օրենսդրական դաշտ եւ վերահսկողության մեխանիզմներ են ստեղծել, որոնք յուրաքանչյուր քաղաքացու վստահություն պետք է ներշնչեն, որ իր ձայնը վճռական կլինի` հինգ տարով քաղաքական տեղաբաշխումը որոշելու հարցում»,- նշել է Սարգսյանը:



Վերջում պաշտպանության նախարարը լավ տրամադրություն, խաղաղություն եւ քվեարկության հանգիստ օր է մաղթել:


Միեւնույն ժամանակ որոշակի ընտրախախտումներ են գրանցել դիտորդական կազմակերպությունները:


«Անկախ դիտորդը» այս պահի դրությամբ արձանագրել է, որ ՏԸՀ նախագահը չի տիրապետում իրավիճակին՝ դիտարկվող տեղամասերի 10 տոկոսում: «Տեսախցիկները կարող են խախտել քվեարկության գաղտնիությունը՝ տեղամասերի 5 տոկոսում: Քվեախցիկի հետևը պատ չի տեղամասերի 25 տոկոսում: Քվեաթերթիկներ չեն եղել 20 տոկոսում:


Ուշացումով են բացվել տեղամասերի 10 տոկոսը: Բազմաթիվ տեղերում հանձնաժողովները չեն կնքում քվեարկության կտրոնները: Մեր դիտորդնեից 6-ի իրավունքները խախտել են, բայց որևէ մեկը չի լքել տեղամասը», - հայտնում է դիտորդական առաքելության մամուլի խոսնակը:


Գլխավոր դատախազության հաղորդագրության համաձայն՝ Խորհրդարանական ընտրությունների նախապատրաստման և անցկացման ընթացքում հնարավոր ընտրական իրավախախտումների վերաբերյալ մամուլի և զանգվածային լրատվության մյուս միջոցների հրապարակումները, քաղաքացիների հաղորդումները և ՀՀ գլխավոր դատախազության թեժ գծով ստացված ահազանգերը ուսումնասիրելու, ըստ ենթակայության ուղարկելու, այդ հաղորդումների քննարկման, դրանց հիման վրա նախապատրաստված նյութերի և հարուցված քրեական գործերի նախաքննության նկատմամբ դատախազական հսկողության արդյունավետությունը բարձրացնելու և այդ ոլորտում դատախազության գործունեությունը համակարգելու նպատակով գլխավոր դատախազի հրամանով ստեղծված աշխատանքային խումբը երեկվա դրությամբ արդեն իսկ ուսումնասիրել է ընտրական իրավախախտումների վերաբերյալ 225 հաղորդում, որոնցից առերևույթ ընտրական բնույթի հանցագործության հատկանիշներ են պարունակել 57-ը:


Այդ 57 հաղորդումներում նշված հանգամանքները պարզելու նպատակով դրանք ուղարկվել են ոստիկանության տարածքային բաժիններ՝ դրանցում նշված հանգամանքերը պարզելու նպատակով ստուգողական գործողություններ կատարելու համար: 57-ից 42-ով դրանցում նշված հանգամանքները հերքվել են կամ չեն հաստատվել, իսկ մյուսներով ստուգողական գործողությունները դեռևս շարունակվում են:


Առերևույթ ընտրական բնույթի հանցագործության հատկանիշներ պարունակող 57 հաղորդումներից 46-ը վերաբերել են առերևույթ ընտրական կաշառք բաժանելուն, իսկ 11-ը՝ քաղաքացու անտրական իրավունքի ազատ իրականացմանը խոչընդոտելու դեպքերին, ասված է հաղորդագրությունում:


Նշումներ:

Էջի հասցեն: https://verelq.am/hy/node/16554