Դոնալդ Թրամփի ընտրության կապակցությամբ սկզբնական հրճվանքը Կրեմլում փոխվել է թերահավատության: Այս մասին գրում է Bloomberg-ը՝ վկայակոչելով Ռուսաստանի բարձրաստիճան պաշտոնյաներին:
Կրեմլում, համաձայն Bloomberg-ի, արդեն այնքան էլ համոզված չեն, որ Միացյալ Նահանգների հետ հարաբերությունները Թրամփի օրոք հնարավոր կլինի շտկել կարճ ժամանակում։ «Սկզբնական հրճվանքը, թե Սպիտակ տանն է հայտնվել Վլադիմիր Պուտինի կողմնակիցը, Կրեմլում փոխվել է թերահավատության»,- ռուսաստանցձ 4 բարձրաստիճան պաշտոնյաների կարծիքն է վկայակոչում Bloomberg-ը։
Մոսկվայի տրամադրությունների փոփոխության պատճառը Միացյալ Նահանգների ընտրված նախագահի որոշ հայտարարություններն են։ Մասնավորապես, ԱՄՆ-ի միջուկային ներուժը հզորացնելու, ինչպես նաեւ եվրոպական լրատվամիջոցներին տված հարցազրույցում Ռուսաստանի նկատմամբ պատժամիջոցների մեղմումը զինաթափման շուրջ բանակցությունների հետ կապելու մասին Թրամփի հայտարարությունները։
«Կրեմլում Թրամփից ակնկալիքների առումով լուրջ փոփոխություն կա»,- Կրեմլին մոտ կանգնած քաղաքագետ Ալեքսեյ Չենսակովի խոսքերն է մեջբերում Bloomberg-ը։
«Ռուսաստանի ղեկավարությունն այժմ հստակ տեսնում է, որ հարաբերությունների վերականգնումը դյուրին գործ չի լինելու»,- ասել է քաղաքագետը:
Մենք լավ հարաբերություններ ենք ուզում Ամերիկայի հետ: Այս մասին BBC-ին տված հարցազրույցում հայտարարել է ՌԴ նախագահի մամուլի քարտուղար Դմիտրի Պեսկովը:
«Մենք կարծում ենք, որ աշխարհում եւ մեր տարածաշրջանում գոյություն ունեցող բազմաթիվ խնդիրներ չենք կարող լուծել՝ առանց ամերիկացիների հետ համագործակցության: Այդ պատճառով մեզ Վաշինգտոնի հետ լավ հարաբերությունները չափազանց անհրաժեշտ են, բայց, ինչպես ասում են, տանգոյի համար երկուսն են պետք: Բայց մեծ հարց է, թե ինչպիսին կլինի նախագահ Թրամփի մոտեցումը»,- նշել է նա:
Էջի հասցեն: https://verelq.am/hy/node/14487