Հայաստանը 2027-ից հրաժեշտ կտա պլաստիկ տոպրակներին ու մեկանգամյա սպասքին

2027 թվականի հունվարի 1-ից Հայաստանում ուժի մեջ կմտնի պոլիէթիլենային տոպրակների և մեկանգամյա օգտագործման պլաստիկ սպասքի օտարման ու առկայության խիստ արգելք։ Այս քայլը, որն ուղղված է շրջակա միջավայրի աղտոտման դեմ պայքարին, կտարածվի առևտրի և հանրային սննդի գրեթե բոլոր օբյեկտների վրա, իսկ խախտողների համար սահմանվել են զգալիորեն բարձր տուգանքներ՝ մինչև 150 հազար դրամ։

Կառավարության նիստում նախագծերի փաթեթը ներկայացրեց ՇՄ նախարար Համբարձում Մաթևոսյանը։ Փաստաթղթով նախատեսվում է արգելել պոլիէթիլենային պարկերի և տոպրակների, այդ թվում՝ նախկինում թույլատրված 50 միկրոնից ավելի հաստություն ունեցողների առկայությունն ու վաճառքը խանութներում, հանրային սննդի օբյեկտներում և շրջիկ առևտրի կետերում։ Բացառություն կկազմեն միայն կշռափաթեթավորման համար նախատեսված պարկերը և երկրորդային հումքից պատրաստված աղբի տոպրակները։

Միաժամանակ կարգելվի նաև պլաստիկից կամ փրփրապլաստից պատրաստված մեկանգամյա օգտագործման սպասքի ու տարաների օտարումը, որպես այլընտրանք դիտարկելով թղթե և կտորից բազմակի օգտագործման տոպրակները, ինչպես նաև թղթից, փայտանյութից կամ փայլաթիթեղից պատրաստված սպասքը։

Արգելքը խախտող տնտեսվարողների համար պատասխանատվությունը խստացվում է։ Եթե գործող կարգավորմամբ տուգանքը 30-100 հազար դրամ է, ապա նոր նախագծով առաջին խախտման դեպքում կկիրառվի նախազգուշացում, իսկ կրկնվելու դեպքում՝ տուգանք 100-ից 150 հազար դրամի չափով։ Նախարարի խոսքով՝ պլաստիկի սահմանափակումը ոչ միայն բնապահպանական, այլև տնտեսական ու առողջապահական նշանակություն ունի՝ նպաստելով շնչառական հիվանդությունների և քաղցկեղի ռիսկերի կանխարգելմանը։

Վարչապետ Նիկոլ Փաշինյանն ընդգծեց, որ պլաստիկի խնդիրը երկրում վաղուց է հասունացել և ունի «ահագնացող» չափեր, որոնք տեսանելի են ամեն քայլափոխի։ Նա կարևորեց հանրային իրազեկման արշավների անցկացումը և տնտեսվարողների հետ ամենօրյա աշխատանքը՝ չբացառելով նաև աջակցության ծրագրերի անհրաժեշտությունը։ Իր հերթին փոխվարչապետ Մհեր Գրիգորյանը կարծիք հայտնեց, որ խնդրի իրական լուծման համար պետք է պայքարել պլաստիկի արտադրության և ներմուծման դեմ։