Մենք համաձայն չենք խնդիրներ լուծելու պատրվակով օտարների ներկայությանը տարածաշրջանում, և կարծում ենք, որ նրանց ներկայությունը ոչ միայն չի լուծի խնդիրը, այլ ավելի մեծ խնդիր կդառնա տարածաշրջանի ազգերի և կառավարությունների համար: Այս մասին Հայաստանի փոխվարչապետ, ՀՀ-Իրան տնտեսական համագործակցության համատեղ հանձնաժողովի նախագահ Մհեր Գրիգորյանի հետ հանդիպմանը հայտարարել է Իրանի նախագահ Էբրահիմ Ռաիսին: «Մենք աջակցում ենք Թեհրանի և Երևանի միջև ձեռք բերված պայմանավորվածությունների լիարժեք իրականացմանը», — ասել է Ռաիսին։ Ռաիսին Գրիգորյանի և նրան ուղեկցող պատվիրակության հետ հանդիպման ժամանակ ընդգծել է, որ Թեհրանի և Երևանի միջև հարաբերությունները պատմական են, բարեկամական և կառուցողական: Անդրադառնալով Հարավային Կովկասի խնդիրներին՝ նա նշել է Իրանի ջանքերը կայունության և անվտանգության պահպանման ուղղությամբ։ Իրանի նախագահն այնուհետև ողջունել և իր աջակցությունն է հայտնել Հայաստանի և Ադրբեջանի միջև խաղաղության բանակցություններին՝ ընդգծելով Իրանի Իսլամական Հանրապետության կամքն ու պատրաստակամությունը՝ երաշխավորելու կովկասյան տարածաշրջանի ռազմավարական անվտանգությունը և այդ հարցում Թեհրանի կարմիր գծերը։