Կառավարությունն այսօր՝ հոկտեմբերի 18-ի իր որոշմամբ որպես նվիրատվությունը ընդունել է Վայոց Ձորի մարզի Եղեգնաձորք համայնքում գտնվող 1 հեկտար մակերեսով եւ 12,420,000 ՀՀ դրամ կադաստրային արժեքով հողամասը և այն որպես պետական սեփականություն ամրացնել ՀՀ Վայոց ձորի մարզպետարանին:

Այս որոշման անհրաժեշտությունը պայմանավորված է նրանով, որ այդ տարածքում նոր հիվանդանոց է կառուցվելու:

Որոշման հիմնավորման մեջ նշվում է, որ ՀՀ Վայոց ձորի մարզում նոր բժշկական կենտրոնի շենքի կառուցման աշխատանքները ընդգրկվել են Համաշխարհային բանկի կողմից ֆինանսավորվող վարկային ծրագրի շրջանակներում: Հիմք ընդունելով ՀԲ կողմից իրականացվող քաղաքականությունը, շինարարական աշխատանքները պետք է իրականացվեն որևէ շինությամբ չծանրաբեռնված պետական հողի վրա:

Միաժամանակ, հաշվի առնելով այն հանգամանքները, որ նորաստեղծ ԲԿ նոր շենքը կառուցվելու է ՀՀ-ին տրամադրված վարկային միջոցներով և որ ԲԿ-ն ստեղծվելու է որպես 100 տոկոս պետական մասնակցությամբ ՓԲ ընկերություն, շենքի նկատմամբ հետագայում պետք է գրանցվի ՀՀ սեփականության իրավունքը:

Հիմք ընդունելով նշվածը, շինարարական աշխատանքների իրականացման համար տեղական իշխանությունների կողմից առաջարկված հողատարածքը Եղեգնաձոր համայնքի ավագանու որոշմամբ նվիրվում է Հայաստանի Հանրապետությանը

Քանի որ վարկային ծրագրի շրջանակներում արդիականացվող բժշկական կենտրոնները պետական ընկերություններ են, կառուցվող շենքերի նկատմամբ գրանցվում է ՀՀ սեփականության իրավունքը, այնուհետև կառուցված շենքերը` դրանց սկզբնական արժեքներով, ներդրվում են ընկերությունների կանոնադրական կապիտալներ:

Նախագիծը մշակվել է ՀՀ առողջապահության նախարարության «Առողջապահական ԾԻԳ» պետական հիմնարկի կողմից:

Ակնկալվում է, որ ՀՀ կառավարության որոշման նախագծի ընդունումը կնպաստի ՀՀ Վայոց ձորի մարզում նոր բազմապրոֆիլ բժշկական կենտրոնի ստեղծմանը, վերջինիս կողմից մատուցվող բժշկական օգնության ծառայությունների որակի ապահովմանը, կբարելավի մարզային բուժ. հաստատություն դիմելիության ցուցանիշները, ինչպես նաև կնպաստի մարզում առկա բժշակական ծառայությունների մատչելիության աճին: