Քաղաքական մակարդակով Հայասատանն ու Ռուսաստանը պահպանում են ու իրականացնում են նախորդ տարիներին ձեռք բերված պայմանավորվածությունները, ինչը նշանակում է, որ Հայաստանում տեղի ունեցած իրադարձությունները չեն ազդել երկկողմ հարաբերությունների վրա՝ ամեն ինչ արդեն փորձված ճանապարհով ընթանում էր առաջ: Այս մասին այսօր լրագրողների հետ հանդիպմանն ասաց Հայաստանում Ռուսաստանի առևտրային ներկայացուցիչ Անդրեյ Բաբկոն:

Նրա խոսքով, քաղաքական բաղադրիչի փոփոխություն չի նկատվում,  հակառակը՝ տեսանելի է շփումների ակտիվացում ՀՀ վարչապետ Նիկոլ Փաշինյանի ու ՌԴ նախագահ Վլադիմիր Պուտինի, վարչապետ Դմիտրի Մեդվեդևի միջև: Բայց, ընդգծեց նա, պետք չէ մոռանալ, որ քաղաքական բարեփոխումներով տարվելը չպետք է խաթարի ներդրումների համար բարենպաստ միջավայրի ձևավորմանն ուղղված ջանքերը:  

«Որոշ «բացահայտումներ», իհարկե, ոչ այնքան լավ են անդրադառնում այս գործընթացի վրա: Բայց մարդիկ չեն կորցնում հույսն ու հավատը և, կարծում եմ, այդ ամենը կվերակառուցվի: Եվ հայկ քաղաքական գործիչները պետք է հասկանան, թե ինչից է կազմված Հայաստանի տնտեսությունը, ինչ ընկերություններ են այստեղ աշխատում, որ 3/4-ով դրանք ռուսական կապիտալով ընկերություններն են, ռուսական առաջատար ընկերությունների դուստր ընկերությունները: Այնպես որ այս իմաստով ևս քաղաքականությունը պետք է զգույշ լինի»,- ասաց նա:

Անդրադառնալով երկկողմ տնտեսական հարաբերություններին Բաբկոն նախ նշեց, որ քաղաքական բարեփոխումներով զբաղվելիս չի կարելի մոռանալ ներդրումների համար բարենպաստ միջավայրի ձևավորման մասին, այնուհետ ընդգծեց, որ Ռուսաստանը փորձում է խթանել ոչ միայն արտահանումը դեպի Հայաստան, այլև ներկրումը Հայսատնից: Ըստ նրա, 2018 թվականի առաջին վեց ամիսներին Հայաստանի և Ռուսաստանի միջև առևտրաշրջանառությունը շուրջ 26 տոկոսով գերազանցել է նախորդ տարվա նույն ժամանակահատվածի ցուցանիշները: Եվ բացի ավանդական գյուղատնտեսական մթերքների ներկրումից, ասաց նա, բավականին ակտիվացել է ՀՀ-ից ՌԴ ձկնամթերքի, տեքստիլի, կոշիկների ներկրումը, որոնք «ճաշակով են և պահանջված են Ռուսաստանում»:

«Ռուսաստանը Հայաստանի տնտեսությունում լուրջ դեր է խաղում, երկրում բոլոր ուղղակի արտասահմանյան ներդրումների շուրջ 37 տոկոսը ռուսական են», - հավելեց բանախոսը:

Հիշեցնենք, հոկտեմբերի 17-19-ը Հայաստանում 8-րդ անգամ կանցկացվի «Expo-Russia Armenia 2018» միջազգային արդյունաբերական ցուցահանդեսը և Երևանի բիզնես-ֆորումը: