Ադրբեջանի միլի մեջլիսի պատգամավոր, ադրբեջանա-ռուսական միջխորհրդարանական համագործակցության խմբի ղեկավար Ալի Հուսեյնլին հայտարարել է, որ նպատակահարմար է քննարկել Ադրբեջանի մասնակցությունը ՀԱՊԿ-ին:
«Կարծում եմ, աշխարհաքաղաքական նոր իրողություններում կարելի է քննարկել Ադրբեջանի մասնակցությունն այդ կազմակերպությունում», — minval.az հաղորդմամբ ասել է նա:
Նա նշել է, որ սխալ է ՀԱՊԿ-ը դիտարկել որպես սպառնալիք Ադրբեջանի ինքնիշխանությանը: Ըստ նրա, Ղազախստանը, Տաջիկստանն ու Բելառուսը անդամակցության տարիների ընթացնում այն չեն կորցրել, հակառակը՝ ամրապնդել են իրենց անկախությունը:
«Բացի Հայաստանից, անդամ բոլոր պետությունների հետ մենք ունենք համագործակցային լավ հարաբերություններ: Եվ այս իմաստով, մասնակցությունը ՀԱՊԿ-ում հնարավորություն կտա մեզ ոչ միայն հետևել, այլև ազդել գործընթացների վրա: Բացի այս, հարկ է հաշվի առնել, որ ցանկացած պետություն, ժամանակի ընթացքում կարող է լքել կազմակերպությունը, իսկ որոշումներն այնտեղ ընդունվում են կոնսենսուսով: Այնպես որ ես որևէ վտանգներ Ադրբեջանի համար չեմ տեսնում և կարծում եմ, որ կարելի է սկսել դիտորդի կարգավիճակից», — հայտնել է նա:
Ադրբեջանցի պատգամավորը նաև հայտարարել է, որ Ադրբեջանի ՀԱՊԿ-ում գտնվելը իր ազդեցությունը կունենա նաև ղարաբաղյան հակամարտության կարգավորման գործընթացի վրա, քանի որ այդ դեպքում այն Ռուսաստանի համար կվերածվի երկու գործընկերների միջև հակամարտության, ինչը հիմք կհանդիսանա էլ ավելի ակտիվացնել իր միջնորդ ջանքերը: «Իսկ բացի այդ, ՀԱՊԿ անդամ են հանդիսանում այն պետությունները, որոնք աջակցում են Ադրբեջանի տարածքային ամբողջականության սկզբունքի ապահովմանը», — հավելել է նա:
Էջի հասցեն: https://verelq.am/hy/node/34754