Հայաստանի նախկին վարչապետ և մինչ Նիկոլ Փաշինյանի վարչապետ ընտրվելը վարչապետի ժամանակավոր պաշտոնակատար Կարեն Կարապետյանը հրաժեշտի հայտարարությամբ դիմել է ՀՀ նորընտիր վարչապետ Նիկոլ Փաշինյանին:
Facebook-յան իր էջում Կարապետյանը մասնավորապես գրել է.
«Այսօրվանից ես դադարեցնում եմ վարչապետի պաշտոնակատարի լիազորությունների կատարումը։
Ուզում եմ բոլորին շնորհակալություն հայտնել քննադատության, ոգեւորիչ խոսքերի եւ աջակցության համար։
Շատ հետաքրքիր եւ պատասխանատու ժամանակաշրջան էր։ Ես իմ կարողությունները մաքսիմալ ներդրել եմ աշխատանքի մեջ։
Ցանկանում եմ շնորհակալություն հայտնել Կառավարության մեր թիմին։ Չափազանց պարկեշտ եւ հայրենասեր մարդկանց թիմ էր։ Ուզում եմ շնորհակալություն հայտնել այս ժամանակահատվածում պետական համակարգ մուտք գործած պրոֆեսիոնալ, անկաշկանդ, համարձակ եւ էֆեկտիվ երիտասարդներին։
Շնորհավորում եմ նոր Վարչապետին։ Վարչապետին եւ հաջորդող բոլոր վարչապետերին անկեղծ մաղթում եմ բազմաթիվ հաջողություններ, լավ արդյունքներ, անճգնաժամ աշխատանքային ժամանակահատված եւ միշտ հասկացված լինել ժողովրդի կողմից։
Պատկերացնելով վարչապետի ծանր եւ պատասխանատու աշխատանքը, որը պահանջում է անհոգ օրերի ու գիշերների բացակայություն, առաջարկում եմ մեր համաքաղաքացիներին, լրագրողներին, սոցիալական ցանցերից օգտվողներին եւ քաղաքական ուժերին՝ վարչապետին քննադատելիս անել այն առարկայական, անձնականը եւ ընտանիքը չխառնելով, հակառակը՝ խորհուրդ տալով եւ ոգեւորելով։
Բոլորիդ ԼԱ՛Վ տրամադրություն, ԼԱՎ ԵՂԵ՛Ք:
Շնորհակալություն»:
Էջի հասցեն: https://verelq.am/hy/node/30880