Այս պահին Երեւանում Սերժ Սարգսյանի վարչապետության դեմ ցույց իրականացնող քաղաքացիները ընդդիմադիր քաղաքական գործիչ, «Քաղաքացիական պայմանագիր» կուսակցության առաջնորդ Նիկոլ Փաշինյանի գլխավորությամբ ներխուժեն են Հանրային ռադիոյի շենք եւ փաստացի գրավել այն:
Սկզբից ոստիկանը զենք է ուղղել ցուցարարների վրա, թույլ չի տվել մտնել հանրային ռադիոյի շենք, սակայն ցուցարարներին այնուամենայնիվ հաջողվել է բարձրանալ վերեւ:
Ինչպես դեպքի վայրից հայտնում է VERELQ-ի թղթակիցը, Նիկոլ Փաշինյանը եւ ցուցարարները պահանջում են ուղիղ եթեր տրամադրել իրենց, որպեսզի Փաշինյանը ուղերձով դիմի ՀՀ քաղաքացիներին: Նրանք պնդում են, որ հանրային ռադիոն փաստացի ծառայում է քաղաքական իշխանությանը, բայց հանրությանը, որին կոչված է ծառայել:
«Մենք եկել ենք ուղիղ եթերի համար եւ ցանկանում եմ ուղերձով դիմել քաղաքացիներին», - հայտարարեց Նիկոլ Փաշինյանը:
Այժմ նա բանակցում է Հանրային ռադիոյի ղեկավարության հետ, որպեսզի իրեն տրամադրեն ուղիղ եթեր՝ հանրությանը կոչով դիմելու համար: Հանրային Ռադիոյի տնօրենի տեղակալ Լիկա Թումանյանն առաջարկում է Փաշինյանին ռադիոյով եթեր դուրս գալ այսօր ժամը 7-ին «Ստատուս քվո» հաղորդման շրջանակներում: Այժմ բանակցությունները շարունակվում են:
Նիկոլ Փաշինյանը այդժմ ռադիոյի շենքում խոսում է լրագրողների եւ կոչ անում քաղաքացիներին դուրս գալ փողոց եւ մասնակցել այսօր նախատեսված 18:30-ին հանրահավաքին: Նրանք իրականացնում են շուրջօրյա բողոքի ակցիաներ եւ ապրիլի 17-ին նախատեսում են շրջափակել Խորհրդարանի շենք, որտեղ տեղի է ունենալու վարչապետի պաշտոնում Սերժ Սարգսյանի թեկնածության շուրջ քվերակությունը:
Քիչ առաջ, չստանալով Հանրային ռադիոյի ղեկավարության թույլտվությունը, Փաշինյանը թուղթ պահանջեց, որպեսզի իրեն ուղեկցող լրատվամիջոցների ուղիղ եթերի միջոցով դիմի ՀՀ քաղաքացիներին: Ի դեպ, Հանրային ռադիոյում էլեկտրաէներգիան անջատվել է:
Մինչ այդ Սերժ Սարգսյանի վարչապետության դեմ բազմամարդ երթն ընթանում էր Երեւանի փողոցներում: Երթի մասնաիցները հեղեղել են փողոցները, երթն ընթանում է «Քա՛յլ արա, մերժի՛ր Սերժին» վանկարկումներով, ծափահարություններով ու մեծ ոգեւորությամբ:
Ավելի վաղ այսօր Ծաղկաձորում տեղի ունեցած ՀՀԿ գործադիր մարմնի և խորհրդի արտագնա նիստի արդյունքում կուսակցության նախագահի առաջին տեղակալ Կարեն Կարապետյանի առաջարկությամբ որոշել է ՀՀ վարչապետի պաշտոնում ՀՀԿ խորհրդին ներկայացնել Հայաստանի Հանրապետական կուսակցության նախագահ Սերժ Սարգսյանի թեկնածությունը:
Խորհրդի նիստում գործադիր մարմնի որոշումը ներկայացրել է ՀՀԿ նախագահի առաջին տեղակալ Կարեն Կարապետյանը: Խորհուրդը քննարկել է հարցը և միաձայն կողմ արտահայտվել թեկնածությանը: Ապրիլի 16-ին ՀՀ վարչապետի պաշտոնում ՀՀ Ազգային ժողովի ՀՀԿ խմբակցությունը պաշտոնապես կառաջադրի Սերժ Սարգսյանի թեկնածությունը:
Էջի հասցեն: https://verelq.am/hy/node/29765