Ղարաբաղյան հակամարտությունը շատ լուրջ մարտահրավեր է, այն պետք է կարգավորվի քաղաքական բանակցությունների միջոցով: Այդ մասին հայտարարել է ԵՄ արտաքին գործերի և անվտանգության քաղաքականության գծով գերագույն հանձնակատար Ֆեդերիկա Մոգերինին Ադրբեջանի ԱԳ նախարար Էլմար Մամեդյարովի հետ Բրյուսելում կայացած հանդիպմանը:

Նա նշել է, որ ԵՄ-ում ակնկալում են, որ կողմերը կկատարեն լարվածության նվազեցման և բանակցային գործընթացի արագացման վերաբերյալ պայմանավորվածությունները, գրում է «Ինտերֆաքս-Ադրբեջանը»: «Ստատուս-քվոն անկայուն է: Հակամարտությունը չի կարող հանգուցալուծվել ռազմական ճանապարհով», - ընդգծել է նա: Մոգերինին նշել է, որ հակամարտությունը պետք է կարգավորվի քաղաքական բանակցությունների ճանապարհով՝ միջազգային իրավունքի հիման վրա: Նա նշել է, որ ԵՄ-ն սատարում է ԵԱՀԿ Մինսկի խմբի միջնորդական ջանքերին և առաջարկներին:

ՀՀ նախագահ Սերժ Սարգսյանըտարածաշրջանային այցելության շրջանակներում Երևան ժամանած ԵԱՀԿ Մինսկի խմբի համանախագահների հետ հանդիպմանը, նրանց ուշադրությունը հրավիրելով Բաքվից հնչող վերջին հայտարարությունների վրա, ասել է, որ վերջին հայտարարությունները ևս մեկ վկայություն են, թե որքան հեռու է Ադրբեջանը Մինսկի խմբի համանախագահների առաջարկությունների հիման վրա ղարաբաղյան հիմնախնդրի բանակցային գործընթացն առաջ մղելու պատրաստակամությունից։