Ծանր փուլում ենք գտնվում, այսօր հայտարարեց վարչապետ Հովիկ Աբրահամյանը՝ ներկայացնելով էներգետիկայի և բնական պաշարների նորանշանակ նախարար Լևոն Յոլյանին:
Նախագահ Սերժ Սարգսյանի հրամանագրերով էներգետիկայի նախարար Երվանդ Զախարյանը երեկ ուշ երեկոյան ազատվեց պաշտոնից, նրան փոխարինեց Յոլյանը, ով անգամ անկախ Հայաստանում հասցրել է լինել Համամիութենական լենինյան կոմունիստական երիտասարդական միության բյուրոյի անդամ, այնուհետև տեղափոխվել է մասնավոր սեկտոր, հետո զբաղեցրել առողջապահության փոխնախարարի պաշտոնը։ Վերջին տասը տարիներին Յոլյանը Վերահսկիչ պալատի փոխնախագահն էր, ընդ որում, չլինելով Հանրապետական՝ ընդգրկված էր նաև սահմանադրական փոփոխությունների «Այո»-ի շտաբում, հայտնում է
Ազատությունը:
«Ծանր փուլում ենք գտնվում, համագործակցության, քննարկումների փուլում ենք գտնվում, և ես համոզված եմ, որ այս կարճ ժամանակահատվածում Դուք կմտնենք աշխատանքի մեջ և կփորձեք համապարփակ աշխատանքները առաջ տանել»,- նորանշանակ նախարարին ասաց վարչապետը։
Լրագրողների խնդրանքին մանրամասնել՝ ի՞նչ ծանր փուլի մասին է խոսքը: «Նկատի ունեմ բանակցությունները. Ռուսաստանի Դաշնության հետ հիմա գազի սակագնի պայմանագիրն է քննարկվում, Իրանի Իսլամական Հանրապետության հետ երրորդ գծի կառուցման աշխատանքներն են, Վրաստանի Հանրապետության հետո էլեկտրագծերի կառուցման երկու ծրագիր է ընթանում»,- ասաց Աբրահամյանը։
«Իրանի հետ գազի գնման շուրջ բանակցություններ տարվո՞ւմ են»։ «Գազի գնման մասին չէ խոսքը, գազի պայմանագրի։ Դուք տեղյակ եք, որ մենք գազը ստանում ենք Իրանի Իսլամական Հանրապետությունից և փոխարենը փոխհատուցում ենք էլեկտրաէներգիայով։ Միայն այդ գործարքի շրջանակներում են [ընթանում բանակցությունները]»,- պատասխանեց վարչապետը։
Թե ինչու է մոտ երկու տարի ոլորտը ղեկավարող Զախարյանը հեռացվում աշխատանքից, չհստակեցրեց ո՛չ վարչապետը, ո՛չ ինքը՝ Զախարյանը: «Թողեք գոնե հանգիստ ազատվենք աշխատանքից։ Սա փոխադարձ համաձայնություն, ցանկություն էր, իհարկե»,- ասաց Զախարյանը՝ նշելով, որ առաջիկայում հանգստանալու է։
Զախարյանը, հրաժեշտ տալով նախարարության աշխատակիցներին, ձեռքբերումների շարքում նշեց, թե ի տարբերություն նախորդ տարիներին, երբ «Հայկական էլեկտրական ցանցերը» շարունակ վնասներ էր կուտակում, անցած յոթ ամիսներին ձևավորվել է 3.5 միլիարդ դրամ դրական հաշվեկշիռ:
Իսկ նորանշանակ նախարարը խոստովանեց՝ ոլորտի խնդիրներին դեռ քաջածանոթ չէ։ «Եկեք ավելի մանրամասն խոսենք միառժամանակ հետո, խոսք եմ տալիս, կլինեմ շատ թափանցիկ, հրապարակային, պարզապես խնդիրների մեջ պետք է մտնել, խնդիրների մասին այսօր չեմ ուզում խոսել»,- ասաց Յոլյանը։
