ՊՆ-ի որակմամբ ծառայության վերադառնալու ցանկություն չունեցող զինծառայող Յուրիկ Բրոյանի փաստաբան Հայարփի Սարգսյանը պատասխանել է Պաշտպանության նախարարության Ռազմական ոստիկանության հայտարարությանը:
«Սա ուղղակի խայտառակություն է...
Նախ՝ զինծառայողը չի բուժվել, այլ՝ զորամասում, ռազմականում բռնության ենթարկվելուց հետո այժմ Յուրիկ Բրոյանի բուժումն անհնարին է դարձել, ուստի, Նուբարաշեն հոգեկան առողջության կենտրոնը նրան դուրս է գրել և արձանագրել այն փաստը, որ չի բուժվում:
Անձամբ մեկ շաբաթ առաջ եմ խոսել բժիշկների հետ, ովքեր հավաստիացրել են, որ պիտանի չէ ծառայությանը, երկրորդ՝ անձամբ մեկ շաբաթ առաջ եմ տեղեկացրել ՀՀ պաշտպանության նախարարությանը, որ վստահորդիս դուրս են գրում, ուղարկեն տուն, խնդրել եմ մի քանի օր ուշ դուրս գրել, որպեսզի զորացրման հարցը պաշտպանության նախարարությունը հասցնի պաշտոնապես կարգավորել, սակայն, ինչպես տեսանք, մինչ օրս որևէ քայլ չէր ձեռնարկվել, և պաշտպանության նախարարության անկազմակերպվածության արդյունքում, զինծառայողին դուրս էին գրել, մոր հետ ուղարկել տուն:
Երրորդ՝ զինծառայողը այնքան հիվանդ է, ցնցումների մեջ, որի մասին արդեն նույնիսկ Եվրոպան է տեղյակ, նա ի վիճակի չէ որևէ անհայտ ուղղությամբ գնալու, կրկնում եմ՝ նրան մոր հետ ուղարկել են տուն, որովհետև նա կրել է առողջության անդառնալի վնաս, այսինքն՝ հնարավոր չէ նրան բուժել:
Չորրորդ՝ բավական չէ այն, որ իմ վստահորդի համար ստեղծել էին այսպիսի պայմաններ, դեռ մի բան էլ ստահոդ լուրերով հոգեբանական ճնշում են գործադրում նրա վրա և զրպարտում, հինգերորդ՝ այսօր առավոտից մի շարք կառույցների հետ հեռախոսակապի մեջ եմ մինչև հիմա և պաշտպանության նախարարության փոխարեն էլ եմ ես աշխատում, որ էս հարցը, այսինքն՝ իրենց բացթողումը, ես կարգավորեմ, ի վերջո, ռազմական ոստիկանությունը մինչ այս ստատուսը, տեղեկացված էր նաև, որ մինչև ժամը 17։00-֊ը Յուրիկ Բրոյանին մայրը պիտի տաներ Մուրացանի հոսպիտալ, որպեսզի վաղը առավոտյան նա ներկայացվի ռազմաբժշկական հանձնաժողովի նիստին, իսկ ինչու՞ մինչ այդ ժամը չի ներկայանա, որովհետև բարձր չափաբաժնով դեղահաբ է նշանակվել, որը նա ընդունել է և միայն արթնանալուց հետո կարող է գնալ հոսպիտալ։
Ցավում եմ, որ մենք ունենք պետական անմարդկային պաշտոնյաներ, բայց հավաստիացնում եմ, որ զինվորին այս վիճակին հասցնելու համար պատասխանատվության են ենթարկվելու՞»։
Ավելի վաղ ՊՆ-ն հայտնել էր, որ զիծառայող շարքային Յուրիկ Վանիկի Բրոյանը բուժումը ստանալուց և դուրս գրվելուց հետո չի պատրաստվում ներկայանալ զորամաս: Հաղորդվում էր, որ ՊՆ-ն միջոցներ է ձեռնարկում զինծառայողին զորամաս վերադարձնելու ուղղությամբ:
