Խաչատրյան քույրերի իրավունքների հարցով Արման Թաթոյանը պայմանավորվել է ՌԴ-ի իր կոլեգայի հետ

Խաչատուրյան քույրերի իրավունքների երաշխավորման հարցով Մարդու իրավունքների պաշտպան Արման Թաթոյանը հեռախոսազրույց է ունեցել Ռուսաստանի Դաշնությունում մարդու իրավունքների հանձնակատար Տատյանա Մոսկալկովայի հետ:

Ինչպես հայտնում են ՄԻՊ-ի մամուլի ծառայությունից, Արման Թաթոյանը Տատյանա Մոսկալկովայի հետ պայմանավորվածություն է ձեռք բերել Խաչատրյան քույրերի հետ կապված փոխանցել համապատասխան տեղեկություններ, հանրության, այդ թվում՝ իրավապաշտպանների մտահոգությունները, որպեսզի գործում առկա մյուս տվյալների հետ ուսումնասիրի և քայլեր ձեռնարկի իր իրավասության շրջանակում։

Հիշեցնենք, որ Մոսկվայում բնակվող Խաչատուրյան քույրերը մեղադրվում են հոր՝ Միխայիլ Խաչատուրյանի սպանության գործով:

2018թ. հուլիսի 27-ին քույրերն իրենց մոսկովյան բնակարանում սպանել են 57-ամյա հորը՝ դանակով հասցնելով բազմաթիվ վնասվածքներ: Քույրերը խոստովանել են իրենց մեղքն ու ասել, որ այլևս ի վիճակի չէին հանդուրժել հոր ստորացումները, ֆիզիկական և սեռական բռնությունը:

ՌԴ քննչական կոմիտեն քրեական գործ է հարուցել Խաչատուրյան քույրերի հոր նկատմամբ, որոնք հիմա անցնում են վերջինիս սպանության գործով՝ որպես մեղադրյալներ: Քույրերի հոր՝ Միխայիլ Խաչատուրյանի արարքներում սեռական բռնության նշաններ են հայտնաբերվել:

Интерфакс եւ ТАСС գործակալությունները՝ իրենց աղբյուրներին հղում անելով հայտնել էին, որ նրան մեղսագրվում են ՌԴ Ք.Օ. 117, 132 եւ 133 հոդվածները՝ ծաղրի եւ կտտանքների ենթարկելը, սեռական բնույթի բռնի գործողությունները, սեռական գործողությունների հարկադրելը: