Վրաստանը և Հայաստանը միացնող «Բարեկամության կամուրջի» շինարարությունը կմեկնարկի օգոստոսին

Հայաստանի և Վրաստանի միջև պետական սահմանի Սադախլո-Բագրատաշեն անցակետի տարածքում՝ Դեբեդ գետի վրա, Վրաստանը և Հայաստանը միացնող «Բարեկամության կամուրջ» նախագծի շինարարական աշխատանքները կմեկնարկեն օգոստոսին: Այս մասին «Ալիք մեդիային» հայտնել է «Tunnel Sadd Ariana» իրանական կազմակերպության հայաստանյան ներկայացուցիչ Արտավազդ Բաղումյանը:

«Նախագծման փուլը կավարտվի մոտ երկու ամսից, եթե ամեն ինչ առանց խոչընդոտների ընթանա, ամենայն հավանականությամբ, օգոստոս ամսին կմեկնարկեն շինարարական աշխատանքները, որոնք կավարտվեն մեկ տարվա ընթացքում:

«Բարեկամության կամրջի» երկարությունը մոտ 200 մետր է: Կկառուցվեն երկու առանձին, մեկ մետր հեռավորության զուգահեռ կամուրջներ: Կառուցվող կամրջի բարձրությունը 18 մետր կլինի՝ սահմանին գտնվող ներկայիս կամրջից երկու մետրով բարձր:

Նոր կամուրջը կկառուցվի եվրոպական չափանիշներին համապատասխան, իսկ հինը` կվերանորոգվի։ 

Հիշեցնենք, Հայաստանն ու Վրաստանը ստորագրել են նոր կամրջի կառուցման վերաբերյալ համաձայնագիրը դեռ 2014-ին՝ վարչապետ Հովիկ Աբրահամյանի և Վրաստանի վարչապետ Իրակլի Ղարիբաշվիլիի  պայմանավորվածության հիման վրա: