Այս տարիների ընթացքում Մարտի 1-ով քննությունը տարվել է փաստերը կոծկելու համար. Փաշինյան

52

Հատուկ քննչական ծառայությունը հետևողական աշխատանք է տանում և բոլորս հասկանում ենք, որ վերջին տասը տարիների ընթացքում ոչ թե քննություն է տեղի ունեցել, այլ ամեն ինչ արվել է, որ բոլոր հնարավոր փաստերը կոծկվեն։ Այս մասին ԱԺ-ում լրագրողների հետ ճեպազրույցում հայտարարեց ՀՀ վարչապետ Նիկոլ Փաշինյանը՝ անդրադառնալով  այն լուրին, որ Մարտի 1-ի գործով սպանության կասկածանքով առաջին ձերբակալվածը կա:


Նրա խոսքով, այն փաստը, որ պարկուճները փոխված են նշանակում է, որ ամեն ինչ է փոխված՝ մարդիկ, դեպքերը, դեմքերը։


«Եթե այս պայմաններում ՀՔԾ-ն կարողացել է հասնել նրան, որ կոնկրետ մարդ ձերբակալվի, ապա ես ուղղակի այդ լուրը իմանալուց հետո շատ էմոցիոնալ պահեր եմ ապրել։ Բայց խոսքը դեռ ձերբակալության մասին է, դեռ չգիտենք մեղադրանք կառաջադրվի, թե ոչ, ինչպես կընթանա: Բայց, որ մարտի 1-ի բոլոր սպանությունները պետք է բացահայտվեն, և այն, որ քննությունը հենց 2008թ. Մարտի 1-2-ից սկսած տարվել է կոծկելու ուղղությամբ՝ ակնհայտ է»,- ասաց վարչապետը։


Վարչապետը նշեց, որ նաև Մարտի 1-ի դեպքերով փաստահավաք խմբի հրապարակած նյութերից էլ երևում է, որ պաշտոնյաները փորձում են կոծկել ճշմարտությունը։ Նա հիշեցրեց Անդրանիկ Քոչարյանի վարած հարցաքննությունը, որից ակնհայտ էր, որ «ոստիկանության զորքերի ներկայացուցիչները ոչ թե պատմում են ճշմարտությունը, այլ փորձում են հնարավոր եղանակներով կոծկել այդ ճշմարտությունը»։


«Այնտեղ տեսարան կար, երբ մի պաշտոնյա ասում էր, որ ավտոմատները լցրել է մեքենայի բեռնախցիկը և բերել, բաժանել է մարդկանց»,- նշեց Նիկոլ Փաշինյանը։


Հիշեցնենք, ՀՀ Հատուկ քննչական ծառայության լրատվական ծառայությունը հայտնել է, որ 2008 թվականի մարտի 1-ից 2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ ՀՀ հատուկ քննչական ծառայությունում քննվող քրեական գործի շրջանակներում 04.06.2019 թվականին ՀՀ քրեական օրենսգրքի 104-րդ հոդվածի 1-ին մասով նախատեսված հանցանք կատարելու` հրազենի գործադրմամբ Զաքար Հովհաննիսյանին դիտավորությամբ կյանքից զրկելու կասկածանքով ձերբակալվել է 2008 թվականի մարտի 1-ի դրությամբ ՀՀ ոստիկանության զորքերի հրամանատարի տեղակալի, նույն ինքը` շտաբի պետի պաշտոնը զբաղեցրած Գեղամ Պետրոսյանը:


 

Տպել

Թեմայի այլ նորություններ
Загрузка...