Ստամբուլում արգելել են անցկացնել Ցեղասպանության զոհերի հիշատակին նվիրված միջոցառումներ

Ստամբուլում Հայոց ցեղասպանության զոհերի ոգեկոչման ու հիշատակի արարողություններն այս տարի անցնում են բավական լարված մթնոլորտում: Նախ՝ Ստամբուլի շրջանի ղեկավարությունն արգելեց Սուլթան Ահմեդի մզկիթի մոտ արդեն ավանդական դարձած հիշատակի ցույցի անցկացումը. թույլատրվել էր անցկացնել միայն լուռ երթ՝ առանց ցուցապաստառների ու ելույթների:


Արգելվել էր նաև այնտեղ մամլո ասուլիս անցկացնել: Երթին մասնակցում էին թուրք իրավապաշտպաններ, Թուրքիայի Մեջլիսի հայազգի պատգամավոր Կարո Փայլանը, հյուրեր արտասահմանից, որոնց թվում՝ Եվրախորհրդարանի ու Ֆրանսիայի խորհրդարանի պատգամավորներ: Այն պահին, երբ լրագրողները սկսեցին հարցեր ուղղել Կարո Փայլանին և երթն այդ պատճառով կանգ առավ, ոստիկաններն անմիջապես միջամտեցին: Նրանք նաև լրատվամիջոցների ներկայացուցիչներին արգելեցին հարցեր ուղղել Փայլանին: Ի պատասխան՝ թուրք իրավապաշտպանները հայտարարեցին, որ չեն ենթարկվելու արգելքին, քանի որ այն հակաիրավական է: Կարճատեւ մամլո ասուլիս, այնուամենայնիվ, տեղի ունեցավ:


Փայլանը կտրուկ քննադատեց Թուրքիայի իշխանություններին՝ նշելով, որ սա Թուրքիայում օրեցօր վատթարացող քաղաքական ու իրավական միջավայրի հետևանքն է: Նրա խոսքով՝ վերջին տարիներին ապրիլի 24-ին նման միջոցառումներ Ստամբուլում անցկացվել են, իսկ այժմ Թուրքիայի իշխանություններն ավելի ու ավելի են ճնշում ազատ խոսքը: Ըստ կազմակերպիչների՝ հիշատակի միջոցառումն արգելել է ոչ թե Ստամբուլի քաղաքապետարանը, որ վերջին ՏԻՄ ընտրություններից հետո անցել է Ժողովրդահանրապետական կուսակցության վերահսկողությանը, այլ տարածաշրջանի իշխանությունը, որն ուղիղ կերպով ենթարկվում է երկրի Կառավարությանը:


Եվրախորհրդարանի պատգամավորն ու ֆրանսիացի խորհրդարանականներից մեկը նույնպես քննադատեցին Թուրքիայի իշխանությունների որոշումը: Նրանց խոսքով՝ այս արգելքը մարդու իրավունքների կոպտագույն խախտում է: Հիշատակի միջոցառումները շարունակվեցին Մարդու իրավունքների պաշտպանության Ստամբուլի գրասենյակում և քաղաքի հայկական գերեզմանատանը, որտեղ ոգեկոչվեց նաև 2011 թվականին թուրքական բանակում սպանված հայազգի Սևակ Բալըքչըի հիշատակը:


Կարո Փայլանն արարողությունից հետո հայտարարեց, որ Սևակի սպանության համար պետք է ներողություն խնդրել, քանի որ չկարողացան կանխել այն, ինչպես Հրանտ Դինքի պարագայում: Նա նշեց, որ քանի դեռ Թուրքիան չի ճանաչել Հայոց ցեղասպանությունը, նման դեպքեր կարող են տեղի ունենալ:


Նա նշեց, որ քանի դեռ Թուրքիան չի ճանաչել Հայոց ցեղասպանությունը, նման դեպքեր կարող են տեղի ունենալ: «Մենք չկարողացանք պաշտպանել Սեւակի կյանքը: Մենք պետք է պայքարենք, որ նրա եւ Դինքի սպանությունը հենց այնպես չանցնի: Ցեղասպանության ճանաչման առաջին հասցեատերը Թուրքիան է, եւ այն պետք է ճանաչի: Մենք այս ուղղությամբ շատ անելիք ունենք, թեպետ Թուքիայում ազատ խոսքը շարունակաբար ճնշվում է», - մեզ հետ զրույցում ասաց Փայլանը:

Տպել

Загрузка...