«Սանիթեք» ընկերությունը պարզաբանում է ներկայացնել վերջին շաբաթում Երևանում աղբահանության հետ կապված իրավիճակի վերաբերյալ և խոստացել է հնարավորինս սեղմ ժամկետներում լուծել հարցը:
Հայտարարության մեջ նշվում է, որ դեռևս նախորդ տարվա հոկտեմբեր-նոյեմբեր ամիսներին ընկերությունը քաղաքապետարանի հետ քննարկումների ժամանակ նախազգուշացրել էր, որ եթե չլինի համատեղ լուծում, ապա աղբահանության կազմակերպման հետ կապված կարող են ծագել խնդիրներ:
«Սանիթեք» ընկերությունն այս ողջ ընթացքում անդադար վնասներ է կրել և չի ստացել ոչ մի փոխհատուցում։ Տեղեկացնում ենք, որ ընկերության և քաղաքապետարանի հետ համատեղ քննարկումները շատ մոտ են հանգուցալուծմանը, որը պետք է հանգեցնի մեր քաղաքի անխափան ու բարձր մակարդակի աղբահանությանը։ Շուտով ավարտին կմոտենա «Սանիթեք» ընկերության և քաղաքապետարանի համագործակցության նոր ձևաչափի քննարկման գործընթացը։
Եվս մեկ անգամ հայցում ենք ձեր բոլորի ներողամտությունը և խոստանում ենք հնարավորինս սեղմ ժամկետներում լուծել մեր սիրելի քաղաքի աղբահանության խնդիրը և վերջնականապես ունենալ անաղբ և մաքուր Երևան»,-ասված է ընկերության տարածած պարզաբանման մեջ։
Քաղաքապետարանը եւս խոստանում է
Ավելի վաղ Երեւանի քաղաքապետ Հայկ Մարությանի մամուլի քարտուղար Հակոբ Կարապետյանը գրառում է կատարել ֆեյսբուքյան իր էջում, որում հայտնել է, որ վերջին շրջանում Երևանում աղբահանության խնդիրը նկատելիորեն վատթարացել է, և աղբահանության միակ օպերատորի աշխատանքը, որը մինչ այդ էլ գոհացուցիչ չէր, է՛լ ավելի անբավարար է դարձել:
«Աղբատար մեքենաների քանակը չի բավականացնում, գործող մեքենաները գրեթե ամեն օր խափանվում են, գրեթե չեն թարմացվում և չեն համալրվում աղբամանները, եղածները չեն լվացվում ու չեն մաքրվում:
Քաղաքապետարանի ու վարչական շրջանների կոմունալ ստորաբաժանումների, քաղաքապետարանի թեժ գծի ծառայության ու հասարակայնության հետ կապերի այլ միջոցներով անընդհատ ստանում ենք լցված աղբամաններով լուսանկարներ: Ահազանգերի մի մասի հետքերով գնում են կոմունալ ծառայության աշխատակիցները՝ փորձելով առավել վատթար վիճակում գտնվող փողոցներում ու բակերում իրավիճակային լուծումներ տալ: Անբավարար է նաև քաղաքի հանրային տարածքների սանմաքրման վիճակը:
Հայտնում ենք, որ քաղաքապետարանը ամենօրյա ռեժիմով աշխատում է՝ վիճակը բարելավելու և վերջնական լուծում տալու ուղղությամբ: Հարցի լուծման իրավական ընթացակարգը որոշակի ժամանակ է պահանջում, այնուհանդերձ, քաղաքապետարանը փորձում է հնարավորինս արագացնել գործընթացը, որպեսզի վերջապես ունենանք նորմալ աղբահանություն և մաքուր քաղաք:
Հայցում ենք երևանցիների և քաղաքի հյուրերի ներողամտությունը՝ աղբահանության օպերատորի անբավարար աշխատանքի համար»,- մասնավորապես ասվում է գրառման մեջ:
5-6 ամիս անարդյունք բանակցություններ
Երեւանի ավագանու “Լույս” դաշինքի ղեկավար Դավիթ Խաժակյանը կասկածում է, որ աղբահանության հարցը շուտ լուծում կստանա:
«2018թ․ հոկտեմբեր ամսից քաղաքապետն հայտարարում է, որ բանակցում են, խնդրի համակարգային լուծումը ընթացքի մեջ է, ամենօրյա ռեժիմով աշխատում են, բանակցում են, բանակցում են․․․
Որպես Երևանի ավագանու անդամ ահազանգում եմ, որ եթե այս ամսվա ընթացքում որոշում չկայացվի խնդրի լուծման վերաբերյալ, ապա ամռանը սպասվում է աղբահանության ճգնաժամ։ Որևէ որոշում որ կայացվի, անհրաժեշտ է ժամանակ նոր տեխնիկա և աղբամաններ ներկրելու համար։ Որքան ուշ կայացվի որոշումը, այդքան ժամանակ նոր տեխնիկա չենք ունենա և քաղաքում կստեղծվի աննախադեպ իրավիճակ։
Ի վերջո 5-6 ամիս անարդյունք բանակցությունների և աղբահանության այսպիսի վիճակի համար պատասխան տվող կա՞», - ասված է նրա Facebook-յան գրառման մեջ։
