Պաշտոնանկությունների պատճառը վարչապետի հանձնարարականը պատշաճ չկատարելն է. խոսնակ

Մեկ օրում վարչապետ Նիկոլ Փաշինյանի որոշմամբ ազատ արձակված պաշտոնյաները պատշաճ չեն կատարել վարչապետի հանձնարարականը։

Այս մասին հայտնել է վարչապետի մամուլի խոսնակ Վլադիմիր Կարապետյանը՝ մեկնաբանելով մեկ օրում վարչապետի աշխատակազմի աշխատակիցներին աշխատանքից ազատելու հարցը:

«Երեք պաշտոնյաներն էլ ազատվել են վարչապետի հանձնարարականը պատշաճ չկատարելու պատճառով»,–ասաց նա՝ հավելելով, որ պաշտոնանկությունների շքերթ բացարձակ չկա:  «Արարողակարգի աշխատակիցը տեղափոխվել է պետական արարողակարգի ծառայություն, իսկ մյուս երկուսի վերաբերյալ օրենքի սահմաններում, հղումներ անելով համապատասխան կարգավորումների վրա, որոշում է կայացվել»,- ասաց Վլադիմիր Կարապետյանը:

Վարչապետի մամուլի խոսնակը չմեկնաբանեց առաջիկայում վարչապետի աշխատակազմի իրավաբանական վարչության պետ Հայկ Մալխասյանի ու Ազգային ժողովի հետ կապերի վարչության պետ Ամալյա Ենգոյանի պաշտոնանկության մասին լուրերը։

Ավելի վաղ հայտնել էինք, որ Ալեքսանդր Մխիթարյանն ազատվել է վարչապետի արարողակարգի պատասխանատուի պաշտոնից, Արթուր Սարգսյանը՝ վարչապետի աշխատակազմի ղեկավարի առաջին տեղակալի պաշտոնից, Մարգարիտ Ազարյանը՝ աշխատակազմի կադրերի եւ անձնակազմի կառավարման վարչության պետի պաշտոնից:

Մինչ այդ հայտնել էինք, որ Մարգարիտ Ազարյանը ԱԱԾ տնօրեն Արթուր Վանեցյանի մայրն է: