Զորավարժությունները չեն նպաստում տարածաշրջանային վստահության մթնոլորտի ամրապնդմանը. ԱԳՆ

Այս օրերին Ադրբեջանի կողմից հարձակվողական բնույթի լայնածավալ զորավարժությունների իրականացումը՝ առանց համապատասխան ծանուցման, որևէ կերպ չի նպաստում տարածաշրջանային անվտանգության ու վստահության մթնոլորտի ամրապնդմանը: Այս մասին ԵԱՀԿ գործող նախագահի հետ համատեղ մամուլի ասուլիսի ժամանակ հայտարարեց ՀՀ արտգործնախարար Զոհրաբ Մնացականյանը: 

Նրա խոսքով, վստահությունն ու անվտանգությունը տարածաշրջանում ԵԱՀԿ ղեկավարության առաջնահերթ գործառույթներն են: Այս կոնտեքստում նա նշեց, որ երեք տարում սա ԵԱՀԿ գործող նախագահի առաջին այցն է տարածաշրջան և իր մեջ քաղաքական կարևոր ազդակ է պարունակում.

«Այս այցը կարևոր ազդակ է այն պայմաններում, երբ կազմակերպության կոնսենսուսի սկզբունքի չարաշահման հետևանքով տարածաշրջանում փակվել են ԵԱՀԿ դաշտային առաքելությունները և նվազագույնի է հասցվել Հարավային Կովկասում ԵԱՀԿ ներկայացվածությունը»,- նշեց Մնացականյանը։

Նշենք, որ մարտի 11-ից ադրբեջանական բանակը լայնամասշտաբ զորավարժություններ է անցկացնում, որոնց մասնակցում են անձնակազմի մինչեւ 10 հազար զինծառայողներ, մինչեւ 500 միավոր տանկեր, զրահատեխնիկա, այդ թվում՝ ավտոմեքենաներ եւ հատուկ տեխնիկա, մինչեւ 300 տարբեր տրամաչափի հրթիռա-հրետանային կայանքներ, համազարկի կրակի եւ ականանետերի ռեակտիվ համակարգեր, մինչեւ 20 միավոր տարբեր նշանակության բանակային եւ ճակատային ավիացիա: