Միասնական եվրասիական շուկան դեռ իրականություն չի դարձել. Մելքումյան

Եվրասիական տնտեսական միությունում առաջնահերթությունների իրականացման ճանապարհին ՀՀ համար հնարավոր խոչընդոտների վերացման տարբերակների որոնման նպատակով Տարածաշրջանային եւ Եվրասիական ինտեգրման հարցերի մշտական խորհրդարանական հանձնաժողովում աշխատանքային խումբ է ստեղծվել: Ազգային Ժողովում այսօր տեղի ունեցավ աշխատանքային խմբի առաջին նիստը:

ԱԺ Տարածաշրջանային եւ եվրասիական ինտեգրման հարցերի մշտական հանձնաժողովի նախագահ Միքայել Մելքումյանի խոսքով, թեև կան ստորագրված համաձայնագրեր, սակայն միասնական եվրասիական շուկան դեռ իրականություն չի դարձել՝ կան չլուծված հարցեր: Պատգամավորի խոսքով, կան խնդիրներ, որոնք պետք է լուծվեն.

«ԵԱՏՄ անդամ բոլոր երկրներում պետք է ընդհանուր սոցիալական միջավայր լինի», - ասաց նա:

Մելքումյանի խոսքով, առայժմ վաղ է խոսել ԵԱՏՄ-ում միասնական արժույթի անցման հեռանկարի մասին. դա գաղափար է, որը կարելի է քննարկել, բայց դեռ վաղ է խոսել դրա իրականացման մասին։ Միևնույն ժամանակ նա չի բացառում, որ այդ օրը կգա, եթե լինի կոնսենսուս:

Մելքումյանը կարևորեց Հայաստանի անդամակցությունը ԵԱՏՄ-ին, քանի որ դա հնարավորություն է տալիս երկրին նաև լավ արդյունքներ գրանցել արտահանման առումով: Նա նշեց, որ ՀՀ-ՌԴ ապրանքաշրջանառությունը աննախադեպ աճ է արձանագրել՝ կազմում է 2 մլրդ դոլար: Դեռ երեք տարի առաջ, հիշեցրեց նա, այդ ցուցանիշը կիսով չափ պակաս էր՝ 1 մլրդ դոլար: