Իրանական գազի ծավալը բարձրացնելու համար գործող գազամուղը միանգամայն բավարար է․ նախարար

ՀՀ տնտեսական զարգացման և ներդրումների նախարարի կարծիքով՝ Հայաստանի՝ իրանական գազի համար տարանցիկ երկիր լինելը միայն դրական ազդեցություն կարող է ունենալ: Նա գազատար խողովակաշարի պոտենցիալը միանգամայն բավարար է համարում Իրանից ներկրվող գազի ծավալը ավելացնելու համար:

Նախարար Տիգրան Խաչատրյանը նման տեսակետ հայտնեց կառավարության նիստից հետո լրագրողների հետ զրույցում։ «Իրանական գազի համար տարանցիկ երկիր լինելու և ավել գազ ներկրելու հնարավորությունը միայն դրական կարող է ազդել Հայաստանում եղած ենթակառուցվածքը արդյունավետ օգտագործելու համար: Որքան տեղյակ եմ՝ այսօր եղած հզորությունները թույլ են տալիս կրկնապատկել ծավալները»,-ասաց Խաչատրյանը:

Պատասխանելով հարցին՝ արդյոք գազամուղի խողովակաշարը թույլ կտա էականորեն բարձրացնել Իրանից ներկրվող գազի ծավալները՝ բնակչության սպառման կամ Վրաստան տարանցելու համար՝ նախարարն ասաց՝ այո: «Որքան տեղյակ եմ՝ գազամուղի ընդհանուր պոտենցիալի կեսն է օգտագործվում, կամ, միգուցե, ավելի պակաս»,-եզրափակեց նա: