ԱՄՆ-ը և ԵՄ-ը սկսում են Իրանի ապաշրջափակման գործընթացը

ԱՄՆ-ը և ԵՄ-ը հայտարարել են Իրանի նկատմամբ կիրառած պատժամիջոցների չեղարկման մեկնարկի մասին: Մասնավորապես, ԵՄ-ը իրավական ակտեր է ընդունել, որոնք անհրաժեշտ են Իրանից տնտեսական և ֆինանսական պատժամիջոցների չեղարկման համար, որոնք վերաբերվում են միջուկային ծրագրին:

«Այսօր իրանական միջուկային ծրագրի շուրջ համապարփակ գործողությունների պլանի ընդունման օրն է: ԵՄ-ը ընդունել է օրենսդրական բազան տնտեսական և ֆինանսական պատժամիջոցների չեղարկման համար, որոնք վերաբերվում են միջուկային ծրագրին», - այդ մասին նշվում է ԵՄ-ի արտաքին հարաբերությունների և անվտանգության քաղաքականության գերագույն հանձնակատար Ֆրեդերիկա Մոգերինիի և Իրանի ԱԳ նախարար Մոհամմադ Ջավադ Զարիֆի համատեղ հայտարարության մեջ, փոխանցում է Lenta.ru կայքը:

Նշվում է, որ սահմանափակումները չեղարկվելու են այն բանից հետո, երբ ՄԱԳԱՏԷ-ն հաստատի Թեհրանի կողմից միջուկային պարտավորությունների կատարումը: Հոկտեմբերի 19-ին Վիեննայում կկայանա ԵՄ-ի և Իրանի համատեղ հանձնաժողովի նիստը, որտեղ կդիտարկվի միջուկային խնդրի շուրջ համապարփակ համաձայնագրի կատարման ընթացքը:

Ինչ վերաբերվում է ԱՄՆ-ին, ապա ԱՄՆ-ի ֆինանսների նախարար Ջեյկոբ Լյուն հայտարարել է, որ Վաշինգտոնը Թեհրանի նկատմամբ կչեղարկի պատժամիջոցներն իրանական միջուկային ծրագրի համապարփակ համաձայնագրի բոլոր պարտավորությունների կատարումից հետո, փոխանցում է ՏԱՍՍ-ը:

Նախօրեին ԱՄՆ-ի նախագահ Բարաք Օբաման հանձնարարել է սկսել Իրանի միջուկային ծրագրի շուրջ ամերիկյան պատժամիջոցների չեղարկման մեկնարկը:

Հիշեցնենք, որ ՄԱԿ-ի ԱԽ-ը հուլիսի 20-ին միաձայն ընդունեց բանաձև, որը հավանություն է տալիս Իրանի միջուկային ծրագրի շուրջ Վիեննային համաձայնություններին: Համաձայնությունը ձեռք է բերվել այս տարվա հուլիսին Իրանի և վեցնյակի՝ ԱՄՆ, ՌԴ, Չինաստան, Մեծ Բրիտանիա, Ֆրանսիա և Գերմանիա միջև: Ըստ համաձայնագրի, Իրանը պարտավորվում է հինգ տարվա ընթացքում չհարստացնել ուրան, որի մակարդակը կանցնի 3,67%-ից և Ֆորդոյի գործորանը վերածել տեխնոլոգիական կենտրոնի: Դրա դիմաց Թեհրանից աստիճանաբար կչեղարկեն բոլոր պատժամիջոցները: