Զոհրաբ Մնացականյանի և Մայք Պոմպեոյի ֆիքսված հանդիպում օրակարգում չկա. ԱԳՆ

Այս պահին ՀՀ ԱԳ նախարար Զոհրաբ Մնացականյանի և ԱՄՆ պետքարտուղար Մայք Պոմպեոյի ֆիքսված հանդիպում նախարարի օրակարգում չկա: Այս մասին հայտարարել է ՀՀ ԱԳՆ խոսնակ Աննա Նաղդալյանը:

Նա նաև հորդորել է նմանատիպ հանդիպումների մասին տեղեկությունների դեպքում հիմնվել պաշտոնական աղբյուրների վրա:

«Ցանկանում եմ հիշեցնել, որ ԱԳ նախարարի՝ իր գործընկերների հետ հանդիպումների նշանակման դեպքում հանրությունը, ըստ կարգի, տեղեկացվում է: Խնդրում եմ նմանօրինակ հարցերում հիմնվել պաշտոնական աղբյուրների վրա», - նշել է նա:

Հիշեցնենք, ինչպես ավելի վաղ VERELQ-ը տեղեկացրել էր, քաղաքագետ Սուրեն Սարգսյանը տեղեկացրել էր, որ նախապատրաստվում է Զոհրաբ Մնացականյան - Մայք Պոմպեո հանդիպումը: «Այն տեղի կունենա շուրջ երկու ամսից, Վաշինգտոնում: Սա հայ-ամերիկյան լճացած հարաբերություններում կարող է լուրջ խթան հանդիսանալ, եթե երկկողմ օրակարգը վերաիմաստավորվի: Նման ձևաչափի (Պետքարտուղար-ԱԳ նախարար պետդեպում) հանդիպում վերջին անգամ տեղի է ունեցել 2013թ.»,- Facebook-ի իր էջում գրել էր Սարգսյանը: