«Իմ քայլը» դաշինքը բաժանեց պաշտոնները. հայտնի են ԱԺ նախագահի եւ փոխնախագահների անունները

ԱԺ ընտրություններում ավելի քան 70 տոկոս վստահության քվե ստացած «Իմ քայլը» դաշինքը այսօր երեկոյան հրավիրած նիստում որոշել է Ազգային ժողովի խոսնակի պաշտոնում առաջադրել առաջին փոխվարչապետի պաշտոնակատար Արարատ Միրզոյանի թեկնածությունը, փոխխոսնակներ կառաջադրվեն Ալեն Սիմոնյանը և Լենա Նազարյանը: Այս մասին նիստից հետո լրագրողներին տեղեկացրեց Ալեն Սիմոնյանը:

«Այլ թեկնածուների քննարկում եղել է վարչության կազմում, որը «Քաղաքացիական պայմանագիր» կուսակցության ղեկավար մարմինն է եւ որը ձեւավորել է նաեւ Ազգային ժողովի մեր ցուցակը: Այդ քննարկումների ավարտին կոնսենսուսով բերվել է այն թեկնածուների ցուցակը, որը ներկայացվեց ներսում»,-ասաց Ալեն Սիմոնյանն ու նշեց, որ որոշումները կայացվել են միաձայն, քննարկումների արդյունքում, եղել է մեկ ձեռնպահ:

Դիտարկմանը, թե քիչ առաջ լրատվամիջոցներով տարածվեց, որ ԱԺ-ում խմբակցությունը ներկայացնելու Լիլիթ Մակունցի թեկնածությունը միանշանակ չի ընդունվել, Ալեն Սիմոնյանը պատասխանեց. «Դա չի համապատասխանում իրականությանը, տարբեր թեկնածուներ են քննարկվել, եկել ենք այն եզրահանգման, որ Լիլիթ Մակունցի թեկնածությունն ամենաճիշտն է»:

Ալեն Սիմոնյանը վստահեցրեց, որ որոշումները միանձնյա չեն ընդունվում, եղել են երկար քննարկումներ, որոնք շարունակվել են այնքան, մինչեւ եկել են կոնսենսուսի եւ դա բոլոր թեկնածուների դեպքում՝ ԱԺ նախագահի, փոխնախագահի, բոլորի:

Սիմոնյանը հայտնեց նաեւ, որ որպես ԱԺ խոսնակ առաջարկվում է Արարատ Միրզոյանի թեկնածությունը, որպես փոխխոսնակներ՝ իր եւ Լենա Նազարյանի թեկնածությունը, խմբակցության ղեկավար կլինի Լիլիթ Մակունցը, իսկ քարտուղար՝ Հակոբ Սիմիդյանը:

ԱԺ առաջին նիստը կկայանա այն օրը, որը կորոշի ԿԸՀ-ն:

Քննարկվել են նաեւ հանձնաժողովների նախագահների անունները․ այս պահին կա 10 հանձնաժողով, կառաջարկվի այդքան, թեպետ Սահմանադրությունը թույլ է տալիս ունենալ 12 հանձնաժողով:

Գործադիրի հարցը, ըստ Ալեն Սիմոնյանի, դեռ որոշված չէ, բայց Ազգային ժողովի կազմը 90 տոկոսով պատրաստ է: