Ռուսաստանի հայերի միության նախագահ Արա Աբրահամյանի՝ Հայաստանում քաղաքական ամբիցիաների բարեհաջող իրականացումը մեծամասամբ կախված է լինելու ռուսական գործոնից: Այդ մասին VERELQ-ի հետ զրույցում նշեց քաղտեխնոլոգ Արմեն Բադալյանը՝ մեկնաբանելով Ռուսաստանի հայերի միության նախագահի՝ ՀՀ խորհրդարանական ընտրություններին մասնակցելու մասին որոշումը:
Հիշեցնենք, որ իր մասնակցության մասին Աբրահամյանը հայտարարել է հոկտեմբերի 14-ին կայացած մամուլի ասուլիսին:
Բադալյանը հիշեցրել է, որ սա Աբրահամյանի հայկական քաղաքական Օլիմպոսը գրավելու առաջին փորձը չէ: Ռուսաստանի հայերի միության ղեկավարը 2003թ.-ին աջակցել է Ռամկավար-Ազատական կուսակցությանը խորհդարանական ընտրություններում, սակայն այդ կուսակցությանը չի հաջողվել անցնել ԱԺ:
«Թե ինչքանով Աբրահամյանը կկարողանա այս անգամ լուծել այդ խնդիրը՝ ցույց կտա ժամանակը: Անկհայտ է, որ 2017թ.-ին խորհդրանական ընտրությունները կանխորոշվելու են երեք հիմնական գործոններով՝ վարչա-ֆինանսական լծակների առկայությամբ, փոքր կուսակցությունների և նախագահի աշխատակազմի միջև պայմանավորվածություններով և վերջապես արտաքին ուժերի՝ ՌԴ-ի ու մասամբ Արևմուտքի աջակցությամբ: Աբրահամյանի դեպքում, իհարկե, մենք գործ ունենք ռուսական գործոնի հետ: Ինչքանով Մոսկվան հետևողական կլինի Աբրահամյանի աջակցության հարցում՝ ցույց կտա ժամանակը»,-նշել է Բադալյանը:
Վերջին տարիների փորձը ցույց է տվել, որ քաղաքական դաշտում նոր դերակատարների հայտնվելը պայմանավորված է լինում առաջացած վակուումով: Այդպես էր "Օրինաց երկիր" կուսակցության պարագայում 2000-ականներին, այդպես էր ԲՀԿ-ի ընդդիմադիր պորթկման ժամանակ: Երկու դեպքերում էլ իշխանություններին հաջողվել է չեզոքացնել իրենց պոտենցիալ մրցակիցներին: ՕԵԿ-ի առաջնորդ
Արթուր Բաղդասարյանը, 2008թ.-ին պարտություն կրելով նախագահական ընտրություններում, հետագայում միացավ իշխող կոալիցիային:
ԲՀԿ-ի առաջնորդ
Գագիկ Ծառուկյանը այս տարվա մարտին հեռացավ իր պաշտոնից այն բանից հետո, երբ իր և իր կողմնակիցների բիզնեսները սկսեցին տոտալ վարչական պրեսինգի ենթարկել գործող իշխանությունները:
Թե ինչպես կվարվեն իշխանությունն ու Սերժ Սարգսյանը Աբրահամյանի հետ դեռևս պարզ չէ: Մամուլի ասուլիսին Աբրահամյանը նշել է, որ քննարկել է իր քաղաքական նպատակները հանրապետության նախագահի հետ և վերջինս ըմբռնումով է դրան վերաբերվել:
Քաղաքագետ
Ալեքսանդր Մարգարովի կարծիքով, խոսել այն մասին, որ Աբրահամյանի հայտնվելը պայմանավորված է որոշակի վակուումով չի կարելի: Վակուում գոյություն ունի բացառապես ընդդիմադիր դաշտում, սակայն ակնհայտ է, որ այդ դաշտում Աբրահամյանը չի պատրաստվում գործել:
«Հնարավոր է Աբրահամյանի քաղաքական գործընթացներին մասնակցելու որոշումը պայմանավորվախ է առկա ռեսուրսներով, ոչ միայն ֆինանսական և ինստիտուցիոնալ, այլ նաև մարդկային: Գոյություն ունի ցանկություն ազդել Հայաստանում գործընթացների վրա դրանցում անմիջական մասնակցությամբ: Ենթադրել, որ Աբրահամյանի որոշումը կայացվել է առանց ռուսական քաղաքական էլիտայի ներկայացուցիչների համակարգման կամ գոնե տեղեկացման սխալ կլինի»,-նշել է Մարգարովը:
Նա դժվարացավ կանխատեսել Ռուսաստանի հայերի միության ղեկավարի շանսերն առաջիկա ընտրություններին՝ նշելով, որ շատ բան կախված կլինի սահմանադրական հանրաքվեից, որը ենթադրում է հաջորդ ընտրակալան ցիկլին ընդառաջ երկրի ինստիտուցիոնալ դիզայնի փոփոխությունի: «Հնարավոր են զանազան տարբերակներ, քաղաքական ուժերի տարբեր կոալիցիաներ: Հարևան Վրաստանում 2012թ.-ի խորհրդարանական ընտրություններից երկու տարի առաջ ոչ ոք չէր կարող երաշխավորել, որ
Բիձինա Իվանիշվիլին իր "Վրացական երազանքով" կգա իշխանության»,-հավելել է նա:
