ԱԺ ընտրությունը Հայաստանում համապատասխանում է հիմնարար ազատություններին. Պետդեպ

Միացյալ Նահանգների Պետքարտուղարությունը շնորհավորել է Հայաստանի քաղաքացիներին դեկտեմբերի 9-ին կայացած խորհրդարանական ընտրությունների կապակցությամբ և ողջունել ԵԱՀԿ ԺՀՄԻԳ դիտորդների գնահատականը:

«ԱՄՆ-ն միանում է ԵԱՀԿ նախնական գնահատականին, համաձայն որի ընտրական գործընթացը վայելում է հասարակության լայն վստահությունը և համապատասխանում է հիմնարար ազատություններին:

Այս տարին Հայաստանի համար կարևորագույն փոփոխություններ նշանավորեց: 27 տարի շարունակ Միացյալ Նահանգները ձգտել է աջակցել Հայաստանում ժողովրդավարական գործընթացների և հաստատությունների զարգացմանը, և մենք կշարունակենք դա անել ապագայում:

Մենք ակնկալում են համագործակցել Հայաստանի նոր Խորհրդարանի և կառավարության հետ՝ խորացնելով մեր երկկողմ գործընկերությունը և համագործակցությունը, ամրապնդելով օրենքի գերիշխանությունն ու ժողովրդավար հաստատությունները, պայքարելով կոռուպցիայի դեմ, զարգացնելով առևտուրն ու ներդրումները և ապահովելով տարածաշրջանային և գլոբալ անվտանգությունը», - ասված է ԱՄՆ Պետքարտուղարության հայտարարության մեջ: