Իլհամ Ալիևն ու Նիկոլ Փաշինյանը Սանկտ Պետերբուրգում զրույց են ունեցել. Բաքու

Ադրբեջանի նախագահ Իլհամ Ալիևը Սանկտ Պետերբուրգում զրուցել է ՀՀ վարչապետի պաշտոնակատար Նիկոլ Փաշինյանի հետ: «ԱզերԹաջի» հաղորդմամբ, այս մասին հայտարարել է Ադրբեջանի նախագահի աշխատակազմի արտաքին քաղաքականության վարչության պետ Հիքմեթ Հաջիևը:

«Զրույցն ընթացել է հայ-ադրբեջանական հակամարտության կարգավորման բանակցությունների ակտիվ շարունակության և հրադադարի ռեժիմի ամրապնդման շուրջ», — ընդգծել է Հաջիևը:

Նրա խոսքով, հարկավոր է հաշվի առնել, որ այս երկու ասպեկտները սերտ փոխկապակցված են և իրար փոխլրացնող են:  

«Վերջին շրջանում զորքերի շփման գծում և պետական սահմանի երկայնքով հարաբերական անդորր է, որը շատ լավ նախադրյալ է ստեղծում հակամարտությունը կարգավորելու վերաբերյալ բանակցություններ վարելու համար: Բայց այն չպետք է հանգեցնի հակամարտության սառեցմանը կամ անընդունելի ստատուս քվոյի պահպանմանը», - ասել է պաշտոնյան՝ ընդգծելով, որ Ադրբեջանը հանդես է գալիս որպես ստատուս քվոյի շուտափույթ փոփոխման կողմնակից:

«ԵԱՀԿ Մինսկի խմբի համանախագահ երկրների ղեկավարների մակարդակով բազմիցս շեշտվել է ստատուս քվոյի փոփոխության կարևորությունը: Հակամարտության կարգավորման շուրջ բանակցությունների շրջանակներում տարածքային ամբողջականությունը և ինքնիշխանությունը պետք է վերականգնվեն միջազգայնորեն ճանաչված սահմանների շրջանակներում», - ասել է նա:

Հաջիևի խոսքով, զրույցի ընթացքում Ալիևը և Փաշինյանը քննարկել են նաև պատանդների փոխանակման հարցը:

Բացի այս, ադրբեջանցի պաշտոնյան նաև մեկնաբանել է երկու երկրների միջև գործող ուղիղ կապը՝ նշելով, որ նման կապն առկա է, բայց այն պետության ղեկավարների, արտաքին գործերի նախարարների կամ պաշտպանության նախարարների մակարդակով չէ, այլ մեկ մակարդակով ցածր է և օգտագործվում է անհրաժեշտության դեպքում: