Փաշինյանը պահեց խոստումը՝ նախագահը կվերադառնա Բաղրամյան 26

Հանրապետության նախագահի նստավայրը Մաշտոցի 47 հասցեից կտեղափոխվի Բաղրամյան 26 հասցե: Համապատասխան որոշումն ընդունվեց կառավարության ասօրվա նիստում:

Ըստ այդմ, վարչապետի նստավայրը Բաղրամյան 26 հասցեից կտեղափոխվի Հանրապետության հրապարակ Կառավարական տուն 1 հասցե: 

Հիշեցնենք, վարչապետի պաշտոնում ընտրվելուց հետո Նիկոլ Փաշինյանը հայտարարել էր, որ Ժամանակի ընթացքում Բաղրամյան 26-ի նստավայրը կվերադարձվի նախագահի աշխատակազմին: Նա նշել էր, որ իր համար կառավարության շենքում աշխատելը հարմարավետ է, այնպես որ հետագայում դա կառավարության որոշումներով կարձանագրեն և վարչապետը կունենա մեկ նստավայր:

Սահմանադրական բարեփոխումների արդյունքում ՀՀ նախագահ Սերժ Սարգսյանը նախագահի պաշտոնավարման ժամկետի ավարտին չցանկացավ հեռանալ Բաղրամյան 26-ից և այն դարձրեց վարչապետի աշխատավայր՝ նախագահականը տեղափոխելով Կառավարության ընդունելության տուն: Սակայն Սարգսյանը այդպես էլ չկարողացավ վայելել այն՝ վարչապետի պաշտոնում նա հաշված օրեր պաշտոնավարեց: