Ընդերք քանդող և խաղադրույք կատարող երկիր այլևս չպետք է լինենք. Փաշինյան

Հայաստանի տնտեսական աճի կառուցվածքը, որը գոյություն ունի երկար տարիներ, չի կարող ընդունելի համարվել պետության համար: Այս մասին Ազգային Ժողովում հայտարարեց ՀՀ վարչապետի թեկնածու Նիկոլ Փաշինյանը:  

Նրա խոսքով, տնտեսական աճը ապահովվում է հիմնականում հանքարդյունաբերության, գյուղատնտեսության և խաղադրույքների շնորհիվ: Իսկ սա, շեշտեց Փաշինյանը, անընդունելի է.

«Հունիսին երկրում արձանագրվել է 11% տնտեսական ակտիվության ցուցանիշ, որը, սակայն, հիմնականում պայմանավորված է ֆուտբոլի աշխարհի առաջնությանը կատարված խաղադրույքներով»,- ասաց նա: Ըստ այդմ, եզրահանգում կարելի է անել, որ մենք ագրարային հանքարդյունաբերող, ընդերք քանդող և խաղադրույք կատարող երկիր ենք, բայց այս իրավիճակը պետք է փոխվի.

«Նման երկրից մենք պետք է վերածվենք տեխնոլոգիական արտադրանքի արդյունաբերական և արտահանմանը միտված տնտեսություն ունեցող երկրի»,- շեշտեց նա։

Միևնույն ժամանակ Փաշինյանն ասաց, որ Հայաստանի տնտեսությունում այս պահին որևէ անառողջ գործընթաց տեղի չի ունենում և նույնիսկ պնդեց հակառակը.

«Թույլ տվեք հայտարարել, որ ՀՀ-ում տեղի է ունենում տնտեսական առողջացման և տնտեսական տրանսֆորմացիայի մեկնարկ»:

Վարչապետի թեկնածուն նաև փաստեր ներկայացրեց, որոնք ապացուցում են դա: Փաշինյանի խոսքով, օրինակ, բացի հանքարդյունաբերության ոլորտից մնացած ոլորտներում իրականացվող ներդրումների ծավալն աճել է 70 տոկոսով, իսկ աշխատատեղերի թիվը՝ 30 տոկոսով: 2018թ.-ի առաջին 9 ամիսների ընթացքում կապիտալ ներդրումներն աճել են 75 տոկոսով, շինարարության ոլորտում, 2017 թվականի սեպտեմբերի համեմատ, արձանագրվել է 3.5 տոկոս աճ: «Մարդիկ ներդրում են անում տնտեսության մեջ»,- վստահ նշեց նա: