Մարգվելաշվիլին կոչ է արել քաղաքացիներին ակտիվ մասնակցել նախագահական ընտրություններին

Վրաստանի նախագահ Գեորգի Մարգվելաշվիլին կոչ է արել երկրի քաղաքացիներին ակտիվորեն մասնակցել նախագահական ընտրությունների երկրորդ փուլին՝ նշելով, որ դա շատ կարևոր է երկրի ժողովրդավարական գործընթացների համար, գրում է apsny.ge-ն:

Մարգվելաշվիլիի խոսքով՝ առաջին փուլում բավականին ակտիվ ու մրցակցային ընտրությունների անցկացումը ժողովրդավարության վառ ցուցիչներից է, և այդ ամենն արտահայտվել է նրանով, որ Վրաստանն այժմ գնում է դեպի ընտրությունների երկրորդ փուլ:

«Կոչ եմ անում բոլորին ակտիվ մասնակցել ընտրությունների երկրորդ փուլին: Դա շատ կարևոր է մեր ժողովրդավարական գործընթացների համար: Այս ընտրություններում պետք է է՛լ ավելի խորանա Վրաստանի քաղաքացու այն զգացողությունը, որ հենց ինքն է քաղաքական ինստիտուտների, այս կամ այն քաղաքական ուժի հաջողության կամ պարտության որոշողը», - ասել է գործող նախագահը:

Նա նաև կոչ է արել միջազգային ու տեղական դիտորդներին իրենց ակտիվ ներկայությունն ապահովել նախագահական ընտրությունների երկրորդ փուլում: