Գաղտնալսման պատվիրատուները հայտնի են. ԱԱԾ տնօրեն

ԱԱԾ տնօրեն  Արթուր Վանեցյանը լրագրողների հետ ճեպազրույցում այսօր հայտարարեց, որ պարզվել են ՀՔԾ պետ Սասուն Խաչատրյանի և իր հեռախոսազրույցի գաղտնալսման պատվիրատուները:  

«Պարզվել է շրջանակը, թե ովքեր են գաղտնալսել և ովքեր են պատվիրել։ Գաղտնալսման եղանակն այս պահին պարզվում է», - ասաց նա։

Ըստ նրա՝ պատվիրատուն հանրության շրջանում «լայն ճանաչում ունի», Հայաստանից է։

«Պատվիրատուն մեկն է, բայց այդ պատվիրատուի մասնակցությունը, փաստաթղթավորելը և հիմնավորելը շատ բարդ է, շատ-շատ բարդ, որը ցավոք սրտի այս փուլում չի լինում», - ավելացրեց նա։

Վանեցյանը նաև պատմեց, թե ինչպե՞ս է հնարավոր եղել գաղտնալսել իրեն ու ՀՔԾ պետին: Այդ պահին նա գտնվել է ռոումինգում, այդ ինտերնետային կապուղին պաշտպանված չէի եղել այն ընթացակարգերով, որոնք ապահովում են խոսակցության պաշտպանությունը երկրի ներսում:

Վանեցյանը հայտարարեց, որ գաղտնալսման ամբողջ նպատակը եղել է իր հրաժարականը։

Ինչ վերաբերում է գաղտնալսված խոսակցության բովանդակությանը, ապա նա շեշտեց, որ կարող է և պատրաստ է պարզաբանումներ տալ.

«Բովանդակության մասով կարող եմ պարզաբանումներ տալ բոլորին և միշտ։ Նշված օրը մենք ունեցել ենք 10 զանգ՝ 8 անգամ ինքն է ինձ զանգահարել, 2 անգամ՝ ես։ Մենք մեկ խոսակցություն չենք ունեցել, որը 8 րոպե 40 վայրկյան է։ Մեր ամենաերկար խոսակցությունը 2,5 րոպե է տևել և այդ խոսակցություններն ամբողջությամբ մոնտաժված են ու ներկայացված որպես մեկ խոսակցություն», - պատմեց նա։

Հիշեցնենք, սեպտեմբերի 11-ին Youtube կայքում հրապարակվել էր ԱԱԾ տնօրեն Արթուր Վանեցյանի և ՀՔԾ պետ Սասուն Խաչատրյանի հեռախոսազրույցը, որում քննարկվում է ՀՀ երկրորդ նախագահ Ռոբերտ Քոչարյանի հարցաքննությունն ու խոսվում այն մասին, թե ինչ պետք է անի դատավորը այդ հարցում: