ՀՀ-ում ներքաղաքական զարգացումները նոր դինամիկա են ստացել` փոխելով քաղաքական լանդշաֆտն ու քաղաքական կուսակցությունների դերն ու նշանակությունը հասարակական-քաղաքական կյանքում:
Վարչապետ Նիկոլ Փաշինյանը ՀՀԿ-ին, ԲՀԿ-ին ու ՀՅԴ-ին զրկեց քաղաքական լծակներից` հեռացնելով նրանց կառավարության կազմից: Սակայն ամենակարևորն այն է, որ հասարակության շրջանում մեծ վարկանիշ ունեցող ու փողոցը կառավարող Փաշինյանը այդ երեք կուսակցություններին հայտարարեց հակահեղափոխական, այսինքն այդ եռյակը կարող է ԱԺ արտահերթ ընտրությունների անցկացման արդյունքներով այլևս չմտնել ԱԺ ու հայտնվել քաղաքական գործընթացներից դուրս:
Չնայած ՀՀԿ-ն չէր մասնակցում Երևանի քաղաքապետի ընտրություններին, սակայն հետևելով այն արդյունքներին, ինչ գրանցեց Փաշինյանի աջակցությունը վայելող Հայկ Մարությանը, ակնհայտ է, որ նա հասկացավ, որ նույն բարձր տոկոսն է հավաքելու Նիկոլ Փաշինյանի թիմը նաև գալիք ԱԺ ընտրություններում:
ՀՀԿ-ն, ԲՀԿ-ն, ՀՅԴ-ն ջախջախիչ պարտություն չկրելու համար գալիք արտահերթ ընտրություններին, որին գնում է Փաշինյանն, օգտագործելով ժողովրդական ճնշումն ու փողոցը, միավորվում են և փորձում են երկարաձգել այսօրվա ԱԺ-ի գոյությունը:
Կուսակցությունների այս եռյակը ցանկանում է ունենալ ստարտային համեմատաբար լավ պայմաններ ԱԺ գալիք ընտրություններում, քանի որ արտահերթ ընտրությունների դեկտեմբերին կայանալու դեպքում, այսօրվա քաղաքական իրավիճակում, երբ Փաշինյանն ու թիմը վայելում են ժողովրդականության մեծ աստիճան, նրանք չեն կարողանալու պահպանել իրենց ներկայությունը ԱԺ-ում կամ այդ ներկայությունը լինելու է նվազագույնը:
ՀՀԿ-ն, ԲՀԿ-ն ու ՀՅԴ-ն նաև հասկանում են, որ մեկ տարի անց քաղաքական իրավիճակն ու էյֆորիան կարող են փոխվել ու Փաշինյանը չի ունենա այն վարկանիշն, որն այսօր ունի և այդ պատճառով նրանք հայտարարում են, որ դեմ չեն արտահերթ ընտրություններին, սակայն ընտրությունների անցկացումը տեսնում են մեկ տարվա ընթացքում՝ գարնանը կամ ամռանը:
Պետք է հասկանալ մեկ բան. անգամ գարնանը Նիկոլ Փաշինյանի վարկանիշը չի կարող լինել այնքան ցածր, որպեսզի վերոնշյալ երեք կուսակցություններն որևէ շանս ունենան մեծամասնություն կազմելու ապագա ԱԺ-ում ու առաջադրելու սեփական վարչապետի թեկնածուն:
Փաշինյանն էլ, լավ հասկանալով այդ կուսակցությունների մտադրությունն ու խուսափելու համար ավելորդ ֆորս-մաժորային իրավիճակներից, ցանկանում է ԱԺ-ի արագ լուծարում ու արտահերթ ընտրությունների անցկացում այս դեկտեմբերին, որպեսզի ժողովրդական ալիքի վրա մեծամասնություն հավաքի ու դառնա վարչապետ` կենտրոնացնելով իր ձեռքում թե՛ գործադիր, թե՛ օրենսդիր իշխանություն և ունենալով քաղաքական թիկունք-մեծամասնություն ԱԺ-ում:
ՀՀ-ում ներքաղաքական վիճակն արագ փոխվում է և կարևոր է պահպանել զսպվածություն, քանի որ հայաստանյան ներքաղաքական ցանկացած բախում կարող է հանգեցնել իրավիճակի սրմանը Ղարաբաղում ու հայ-ադրբեջանական սահմանների երկայնքով:
